BOTA, 22 Janar 2023, 12:33

SHBA, nëntë të vdekur nga të shtënat me armë zjarri në Los Angeles

SHBA, nëntë të vdekur nga të shtënat me armë

Nëntë persona kanë humbur jetën nga të shtënat me armë zjarri në qytetin e Monterey gjatë festimeve për Vitin e Ri Kinez, sipas përditësimeve të BBC.

Ngjarja ndodhi rreth orës 22:20 me orën lokale të së shtunës (06:20 GMT të dielën). Mijëra njerëz ishin mbledhur në qytet për festivalin e Vitit të Ri Hënor në Monterey Park.

Policia ende nuk ka bërë të ditur se sa persona kanë mbetur të plagosur nga të shtënat. Departamenti i Sherifit të Qarkut të Los Anxhelosit tha autori i dyshuar i ngjarjes së rëndë është një burrë, ende i paidentifikuar.

Videot në mediat sociale treguan një prani të madhe policie në qytetin ku ndodhi ngjarja, i cili ndodhet rreth 13 km në lindje të Los Anxhelosit.

Një dëshmitar okular i tha Los Angeles Times se tre persona vrapuan në restorantin e tij dhe i thanë të mbyllte derën pasi kishte një burrë me automatik në zonë.

Festivali vjetor i Vitit të Ri Hënor është një ngjarje gjatë fundjavës që ka tërhequr turma prej më shumë se 100,000 vizitorësh. Festimet e së shtunës mbrëma ishin planifikuar të përfundonin në orën 21:00 me kohën lokale.

Monterey Park ka një popullsi prej rreth 60,000 njerëz dhe është shtëpia e një komuniteti të madh aziatik.