TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një avion luftarak italian, pjesë e një misioni të NATO-s, rrëzoi të premten një dron me origjinë të panjohur që hyri në hapësirën ajrore të Letonisë. Ngjarja ndodhi gjatë sulmeve ukrainase ndaj porteve ruse; këtë e bënë të ditur aleanca e mbrojtjes dhe autoritetet letoneze.
Rreth mesditës, ushtarë letonezë po kërkonin për mbetje të dronit në një zonë pyjore pranë fshatit Rugaji – rreth 35 km larg kufirit të shtetit baltik me Rusinë – vend që ishte identifikuar si një zonë e mundshme e rrëzimit, shkruan A2 CNN. "Nuk mund të japim informacion mbi origjinën e dronit, pasi zona ende nuk është kontrolluar", tha për transmetuesin publik LSM zëdhënësja ushtarake letoneze, Iveta Berzina.
Dy avionë luftarakë italianë "Eurofighter" u ngritën nga Lituania dhe dy avionë turq F-16 u dërguan me urgjencë nga një bazë në Estoni, si përgjigje ndaj zbulimit të dronit mbi hapësirën ajrore letoneze, tha zëdhënësja e NATO-s, Allison Hart. “Të gjithë avionët vepronin nën komandën e NATO-s. Po zhvillohet një hetim dhe NATO është në kontakt të ngushtë me autoritetet letoneze”, tha Hart. “NATO është e gatshme dhe e aftë të reagojë ndaj çdo kërcënimi të mundshëm, 24 orë në ditë, 7 ditë në javë, për të ruajtur territorin tonë dhe për të mbrojtur popullin tonë”.
Dronët ushtarakë ukrainas kanë hyrë gabimisht në hapësirën ajrore të shteteve baltike disa herë gjatë këtij viti.
Para incidentit të së premtes, Ukraina kishte kryer sulme gjatë natës ndaj porteve ruse pranë Shën Pjetërburgut, qytet që ndodhet afër Finlandës dhe vendeve baltike. Guvernatori rajonal, Alexander Drozdenko, njoftoi në Telegram se forcat ruse kishin rrëzuar 15 dronë ukrainas gjatë këtyre sulmeve.
Finlanda gjithashtu ndërmori veprime gjatë natës. Vendi vendosi një zonë të përkohshme ndalimi fluturimi për trafikun ajror dhe detar në Gjirin lindor të Finlandës, siç shpjeguan edhe forcat e armatosura finlandeze në X. Finlanda gjithashtu ndan një kufi me Rusinë.
