TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Pavarësisht se kanë kaluar disa muaj nga plagosja e një vajze të re nga Kenia, që punonte në Tiranë, familjarët dhe avokatët e saj akoma mbeten në kërkim të përgjigjeve prej procesit hetimor që ende nuk ka zbardhur detaje.
Për këtë arsye Rrjeti i Organizatave për Monitorimin e Dhunës me Bazë Gjinore përmes një deklarate publike të mërkurën u bëri thirrje autoriteteve të zbardhin sa më shpejt ngjarjen në të cilën mbeti e plagosur rëndë Joyce, 22 vjeç.
“Në mbrojtje të të drejtave të Joyce, filloi të luftojë Ruth, nëna e vajzës, e cila mbërriti në Tiranë në datën 12 Shtator 2022 duke u përpjekur të marrë informacionin e nevojshëm se çfarë i ka ndodhur vajzës, por për fat të keq deri më tani ky informacion është krejtësisht i munguar”, shkruajnë në deklaratën e tyre përfaqësuesit e Ndihmës Ligjore falas në Tiranë.
Më datë 14 Gusht 2022, Joyce, e reja 22 vjeç nga Kenia, është gjendur pa ndjenja pranë shtëpisë ku banonte, e cila ishte siguruar nga punëdhënësi. Prej atij momenti, ajo i është nënshtruar kujdesit shëndetësor intensiv, por gjendja e saj mbetet e rënduar.
Shërbimi ligjor falas në Tiranë është pjesë e rrjetit të Organizatave të Monitorimit të Dhunës me Bazë Gjinore, dhe ata përfaqësojnë viktimën e veprës penale, në këtë rast vajzën e re nga Kenia në Shqipëri. Në kushte të sekretit të hetimit, organet shtetërore përgjegjëse nuk i kanë dhënë informata të ëmës së Joyce, por sipas avokatëve, ngjarja kërkon reagim, dhe jo heshtje siç ka ndodhur deri më tani.
“Mungesa e masave konkrete të menjëhershme nga organet ligj zbatuese për këto lloj çështjesh, rëndon situatën e personave të dhunuar, veçanërisht në rastet si ky i Joyce, kur dhuna shkakton paaftësi mendore dhe e pengon atë për të luftuar për të drejtat e saj”, shkruhet në deklaratën e ekspertëve të Shërbimit Ligjor Falas. Sipas rrjetit të organizatave për monitorimin e dhunës, dhuna dhe njëkohësisht dhe kohëzgjatja e hetimit favorizojnë hapur dhunuesin.
“Kjo i jep kohën e mjaftueshme dhunuesit për t’u çliruar nga barra e provës, për të manipuluar apo kompromentuar provat që nevojiten gjatë procesit të kërkimit të drejtësisë”, citon deklarata e ekspertëve, duke bërë thirrje për reagim të menjëhershëm konkret prej instancave përgjegjëse.
Pak orë pas deklaratës Policia e Shtetit reagoi duke pretenduar se kishte kryer të gjitha veprimet hetimore për rastin, por nuk bëri me dije nëse kishte zbardhur atë apo nëse ishin mësuar motivet e sulmit që është klasifikuar si “plagosje e rëndë me dashje”. /BIRN
