Vaksinimi po funksionon/ Mbretëria e Bashkuar shënon 10 viktima nga koronavirusi, shifra më e ulët që prej shtatorit

---

Ndërkohë që në Europë shifrat e infektimeve me koronavirus po rriten dhe duket se jemi drejt një vale të tretë të pandemisë, në Mbretërinë e Bashkuar po ndodh e kundërta. Shifrat e infektimeve dhe fataliteteve kanë rënë ndjeshëm, Mbretëria e Bashkuar ka shënuar 10 viktima brenda 24 orëve të fundit, si pasojë e koronavirusit, shifra më e ulët që prej Shtatorit 2020. Ndërkohë janë infektuar me virusin, 3,423 persona si dhe janë shtruar në spital 273 të tjerë. Kujtojmë se në MB gjatë valës së dytë të pandemisë, pati shifra alarmante, deri në rreth 1800 fatalitete në ditë. Shifra e ulët e infektimeve vjen si pasojë e izolimit të gjatë të vendit që prej janarit, por edhe vaksinimit me ritme të larta. Deri në këto momente MB ka vaksinuar mbi gjysmën e popullsisë mbi 18 vjeç, rreth 31.4 milionë persona, me dozën e parë të vaksinës AstraZeneca ose Pfizer dhe rreth 5.2 milionë prej tyre kanë marrë edhe dozën e dytë.

Në Europë, vaksinimi ka qenë me ritme të ngadalta, për shkak të mungesës së dozave, por tashmë edhe për faktin se në disa vende, si Gjermania dhe Hollanda, është pezulluar përdorimi i vaksinës AstraZeneca, për personat nën moshën 60 vjeç, pas dyshimeve se disa episode të rralla të trombozës, janë të lidhura me vaksinën.

Vetëm 10% e popullsisë në Europë kanë marrë dozën e parë të vaksinës, sipas drejtorit të OBSH për Europën, Hans Kluge, i cili e konsideroi fushatën e vaksinimit në Europë si "të papranueshme". “Shpërndarja e këtyre vaksinave është shumë e ngadaltë”, tha ai në një deklaratë. “Ne duhet ta përshpejtojmë procesin duke përshpejtuar prodhimin, duke zvogëluar pengesat për administrimin e vaksinave dhe duke përdorur çdo dozë të vetme që tani kemi nëpër depo. Teksa variantet e reja janë shqetësim dhe ato po vazhdojnë të përhapen, rastet që kërkojnë shtrim në spital po rriten.  Përshpejtimi i procesit të vaksinimit është themelor”, theksoi Kluge. /TPZ.al/