Moderatori shqiptar zbulon sekretin se si doli nga periudha e depresionit

Ai është një ndër moderatorët më të qetë dhe më të sinqertë të ekranit shqiptar. Prej 25 vitesh në ekran ai ka fituar një eksperiencë dhe pjekuri televizive që të gjithë e kanë lakmi. Bëhet fjalë për Bledi Strakoshën një moderator origjinal dhe modest në të njëjtën kohë. I ftuar në emisionin “Pasdite në Top Channel” ai ka rrëfyer se si të gjithë njerëzit e tjerë edhe ai ka pasur periudha të vështira në jetën e tij. Të gjithëve mund t’iu rastisë që të bien në një gjendje depresive, të çekuilibruar që as vet nuk arrijnë ta shpjegojnë, por jo të gjithë arrijnë ta pranojnë dhe aq më tepër publikisht. Bledi ndryshe nga të gjithë ka treguar se ka pasur një periudhë depresive, që siç e quan, ai një periudhë “shpirt artisti” që u shoqërua me një gjendje të pa stabilizuar emocionale.  Pikërisht kjo periudhë e ndihmoi të zbulonte edhe dashurinë e tij të madhe për kafshët.

“Kam pasur një periudhë që mua më pëlqente ta quaja ‘shpirt artistik’, por në të vërtetë ishte një kohë kur kisha më pak stabilitet emocional. Qeni i parë që kam marrë u bë pjesë e jetës sime pikërisht për këtë shkak, për të më nxjerrë nga kjo gjendje”, rrëfeu Bledi për “Pasdite.”

Për të kapërcyer këtë periudhë të vështirë të jetës së tij, Bledi tregoi se ka kontaktuar një psikolog, i cili e kishte këshilluar që të merrte një kafshë në shtëpi sepse ajo do ta ndihmonte për të rifituar stabilitetin emocional. Kështu që qeni i parë i tij, Willy u bë pjesë e jetës së tij në këtë periudhë. Ai sot është shumë i dashuruar me kafshët dhe ata zënë një pjesë të rëndësishme të jetës së tij.