TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Christa Pike, e dënuara me vdekje në Tennessee, e cila i mbijetoi dy dozave të injeksionit vdekjeprurës, është zgjuar pas gjashtë ditësh pa ndjenja dhe tashmë përballet me një “rrugë të gjatë drejt shërimit”.
Lajmin e ka bërë të ditur avokati i saj, Randy Spivey, gjatë një konference për shtyp. Sipas tij, Pike u zgjua të martën dhe filloi të fliste, por gjendja e saj shëndetësore mbetet ende e rëndë.
Spivey tha se 50-vjeçarja ka pësuar disa probleme shëndetësore, përfshirë mpiksje gjaku në njërin krah, pneumoni, vështirësi në gëlltitje dhe mungesë të funksionimit të krahëve.
“As ne dhe as Christa nuk kemi filluar ende të kuptojmë se çfarë do të thotë kjo për shëndetin e saj mendor,” tha Spivey.
U zgjua në spital: “Ku jam dhe kush jeni ju?”
Sipas mjekëve, pjesa më e madhe e pentobarbitalit, ilaçi i përdorur në injeksionin vdekjeprurës, hyri në krahun e Pike në vend që të kalonte në qarkullimin e gjakut.
Sasia e administruar ishte e mjaftueshme për ta vënë në gjumë, por jo për t’i ndaluar zemrën ose për t’i ngadalësuar frymëmarrjen.
Të hënën në mbrëmje, avokati kishte deklaruar se Pike kishte kaluar në vdekje të trurit dhe se të martën do t’i hiqeshin aparaturat që e mbanin në jetë. Por të martën në mëngjes, ajo u zgjua.
Spivey tha se nuk ndodhej në dhomë në momentin kur Pike u zgjua, por fjalët e saj të para ishin: “Ku jam dhe kush jeni ju?”
Sipas avokatit, Pike ishte e zemëruar dhe e hutuar dhe kërkonte të dinte se çfarë i kishte ndodhur. Ajo pyeti gjithashtu për ekipin e saj dhe familjen e viktimës.
Megjithatë, “ajo është shumë e vetëdijshme se shteti u përpoq ta ekzekutonte,” tha Spivey.
Avokati: Ajo bashkëpunoi me ekipin e ekzekutimit
Spivey tha se Pike kishte bashkëpunuar gjatë përpjekjes për ekzekutimin, madje duke ndihmuar ekipin të gjente një venë të përshtatshme për injektimin.
“Ajo ishte e sjellshme dhe e edukuar ndërsa ata punuan për një orë, duke i shpuar krahun me gjilpëra, dhe më pas ndjeu djegien e pentobarbitalit. Pastaj u zgjua në një spital, e rrethuar nga njerëz që nuk i njihte, me një tub në fyt,” tha ai.
Avokati shtoi se “E gjithë kjo mund të parashikohej dhe ishte parashikuar.”
“Çfarë i ndodhi Christa është pikërisht ajo për të cilën shteti ishte paralajmëruar se mund të ndodhte,” vijoi Spivey.
Ekipi ligjor i Pike kishte kundërshtuar ekzekutimin me injeksion vdekjeprurës, duke iu referuar problemeve me venat që 50-vjeçarja ka dhe që, sipas tyre, me shumë gjasa do të shkaktonin komplikime gjatë procedurës.
Gjykata urdhëron ruajtjen e provave
Konferenca për shtyp u zhvillua pas një seance gjyqësore për statusin e çështjes në një gjykatë të Tennessee-t të mërkurën.
Gjatë seancës, kancelarja I’Ashea L. Myles vendosi që shteti duhet të ruajë çdo provë të lidhur me ekzekutimin e dështuar.
Christa Pike u bë personi i parë që i mbijetoi dy dozave të injeksionit vdekjeprurës. Ajo u dënua me vdekje për vrasjen e një shoqeje të klasës rreth tri dekada më parë.
Tashmë, krahas betejës ligjore, Pike përballet edhe me një periudhë të gjatë rikuperimi për shkak të pasojave shëndetësore të ekzekutimit të dështuar.
