TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kina ka nisur shpalosjen e tarifave "hakmarrëse" ndaj Shteteve të Bashkuara të Amerikës, pasi Donald Trump njoftoi tarifa 10% për mallrat kineze.
Pekini ka thënë se do të vendosë tarifa mbi një sërë produktesh amerikane.
Masat që do të shërbejnë si kundërpërgjigje përfshijnë një taksë prej 15% mbi importet e qymyrit dhe gazit natyror të lëngshëm nga SHBA.
Nafta e papërpunuar, makineritë bujqësore, kamionçinat dhe makinat me motor të fuqishëm do të përballen me një tarifë prej 10%.
Kina gjithashtu ka njoftuar një hetim ndaj Google për shkelje të dyshuara të ligjeve kundër monopolit. Hetimi do të kryhet nga Administrata Shtetërore për Rregullimin e Tregut – megjithatë, ende nuk ka detaje të mëtejshme mbi këtë çështje.
Edhe pse shërbimet e kërkimit të Google janë bllokuar në Kinë që nga viti 2010, kompania ende ka disa aktivitete biznesi atje. Për shembull, ajo vazhdon të ofrojë aplikacione dhe lojëra për tregun kinez përmes partneriteteve me zhvillues vendas.
Një përmbledhje e masave që Pekini ka imponuar mbi disa importe amerikane:
*Tarifë prej 15% mbi qymyrin dhe gazin natyror të lëngshëm
*Taksa prej 10% mbi naftën e papërpunuar, makineritë bujqësore, kamionçinat dhe makinat me motor të fuqishëm.
*Njoftimi për një hetim kundër monopolit ndaj Google
*Vendosja e kontrolleve të eksportit mbi 25 lloje produktesh me metale të rralla
*Shtimi i PVH Corp, kompania zotëruese e Calvin Klein dhe markave të tjera, si dhe kompanisë amerikane të bioteknologjisë Illumina, në listën e saj të "entiteteve të pabesueshme"
Në një deklaratë ku njoftoi tarifat hakmarrëse, Kina akuzoi administratën Trump për shkelje të rregullave ndërkombëtare të tregtisë.
"Vendosja e njëanshme e tarifave nga SHBA shkel seriozisht rregullat e Organizatës Botërore të Tregtisë. Kjo jo vetëm që nuk ndihmon në zgjidhjen e problemeve të saj, por gjithashtu dëmton bashkëpunimin e zakonshëm ekonomik dhe tregtar midis Kinës dhe SHBA-së."
Ky vendim tregon gatishmërinë e Pekinit për të reaguar me masa të ngjashme ndaj tarifave amerikane, një lëvizje që ka befasuar disa analistë.
Megjithatë, ndryshe nga tarifat e vendosura nga SHBA, të cilat prekin të gjitha produktet kineze, taksat mbi importet e vendosura nga Kina do të aplikohen vetëm për disa kategori të caktuara mallrash.
SHBA ka pezulluar tarifat 25% për Meksinën dhe Kanadën për një muaj, ndërkohë që është njoftuar se Donald Trump pritet të ketë një telefonat me homologun kinez, Xi Jinping. Disa analistë vlerësojnë se kjo është një taktikë e Trump për të tërhequr vëmendjen dhe për t'u dëgjuar në kërkesat e tij.
