AKTUALITET, 29 Mars 2023, 11:52

Ogerta Manastirliu: Pas mjekëve specialistë, do të ketë sërish rritje page të targetuar për mjekët dhe infermierët

Ogerta Manastirliu: Pas mjekëve specialistë, do të ketë

Sistemit shëndetësor publik i janë shtuar edhe 66 mjekë të rinj, të cilët sapo janë punësuar.

Gjatë takimit me mjekët e rinj, Ministrja e Shëndetësisë dhe Mbrojtjes Sociale, Ogerta Manastirliu foli për përmirësimin e infrastrukturës dhe të teknologjisë, për të krijuar kushtet dinjitoze për punën e mjekëve si dhe për rritjen e incentivave financiarë në vijim.

Manastirliu nënvizoi se duke filluar nga viti 2024, do të ketë sërish rritje të pagës për mjekët e familjes, mjekët e përgjithshëm dhe infermierët.

“Do të kemi këtë vit një rritje të targetuar të pagave për mjekët specialist, paga bazë e të cilëve do të rritet me 500 dollarë.

Gjithashtu do të rrisim pagën -siç e kemi premtuar- edhe për mjekët dhe infermierët tanë në masën 7% këtë vit.

Duke filluar nga viti 2024, ne do të kemi sërish rritje page të targetuar për mjekët e familjes, mjekët e përgjithshëm dhe infermierët tanë, për të garantuar që politika e rritjes së pagave të jetë një politikë e qëndrueshme”, theksoi Manastirliu.