TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Pas autonomisë menaxheriale spitalet do të kalojnë edhe në autonominë financiare. Gjatë një takimi me studentë të Universitetit të Mjekësisë dhe Infermierisë nga Spitali Rajonal i Fierit, zëvendëskryeministrja theksoi se falë kësaj reforme do të bëhet e mundur që edhe mjekët të vlerësohen financiarisht në bazë të performancës së tyre.
“Spitalet me autonomi financiare duke nisur nga ky spital ku ndodhemi sot Rajonali i Fierit, do të ketë mundësi të jetë atraktiv për të gjithë mjekët dhe infermierët duke i klasifikuar ata nga performanca dhe duke pasur parasysh kohën e shkurtër që duhet sot për të ardhur nga Vlora në Fier apo nga Tirana në Fier do të bien edhe barrierat e vendbanimit dhe të vendpunësimit. Shikojeni më afatgjatë. Ju do të shijoni dhe merrni frutet e gjithë kësaj reforme që qeveria shqiptare po nis”, tha Balluku.
Ajo shprehu kënaqësinë për këtë bashkëbisedim duke vënë në dukje se janë mbi 850 praktikantë nga mjekësia dhe infermieria në Spitalin Rajonal të Fierit.
“Qeveria shqiptare do të krijojë kushte e duhura për ushtrimin e profesionit të nderuar që ju keni zgjedhur. Kapitali njerëzor përsa i përket mjekësisë është padyshim kollona më e rëndësishme mbi të cilën duhet të ngrihet sistemi ynë mjekësor. Pra jeni ju apo mjekët që kontribuojnë në të katër anët e vendit. Nga ana tjetër, ju nuk e ushtroni dot profesionin siç duhet nëse nuk keni infrastrukturën e duhur spitalore, ambulatore apo teknike. Sot teknologjia është një pjesë e pandarë e profesionit tuaj, sot duhen gjithmonë e më shumë investime nga qeveria shqiptare, për sa i përket teknologjisë së përdorur në mjekësi. Sot ne duhet të ndjekim ritmin e vendeve të tjera europiane për sa i përket depistimit që është pjesa më e rëndësishme e procesit mjekësor. Këto kanë një kosto të shtuar që diku krijon edhe një kalendar të tërë të hapave të cilat duhen hedhur për përmirësimin e kushteve në mjekësinë publike”, nënvizoi ajo.
Balluku u ndal edhe te autonomia spitalore, proces i cili ka nisur nga Spitali Memorial Fier me autonominë menaxheriale dhe që në vitin 2025 do të aplikohet autonomia financiare.
“Spitalet me autonomi financiare do të kenë mundësi të jetë atraktivë për të gjithë mjekët dhe infermierët duke i klasifikuar ata edhe nga performanca dhe duke pasur parasysh kohën e shkurtër që duhet sot për të ardhur nga Vlora në Fier, apo nga Tirana në Fier do të bien edhe barrierat e vendbanimit dhe të vendpunësimit. Ju do të shijoni dhe merrni frutet e gjithë kësaj reforme që qeveria shqiptare po nis”.
Ministrja e Shëndetësisë, Albana Koçiu nënvizoi se për të rritur interesin e mjekëve dhe infermierëve për të punuar në spitalet publike, qeveria ka ndërmarrë disa incentiva, siç është edhe rritja e pagave.
“Pagat, ato që janë stimuli kryesor për të zgjedhur një profesion, janë dyfishuar”, tha Koçiu.
Spitali i parë ku do të aplikohet autonomia e plotë financiare do të jetë pikërisht Spitali Rajonal i Fierit që u ndërtua para pak vitesh me ndihmën e Turqisë.
Ministrja e Shëndetësisë dhe Mbrojtjes Sociale, Albana Koçiu zhvilloi sot një bashkëbisedim me studentë të Mjekësisë dhe Infermierisë të cilët ushtrojnë praktikën e tyre në Spitalin Rajonal Memorial Fier.
Në fjalën e saj, ministrja Koçiu tha se tashmë ka më shumë mundësi dhe oportunitete, ku ata mund të zgjedhin jo vetëm spitalin ku duan të punojnë, por edhe një sërë incentivash që të kontribuojnë në sektorin publik shëndetësor.
“Pagat një nga stimujt kryesorë për të zgjedhur një profesion, janë dyfishuar duke nisur nga viti 2013. Dhe sot kemi pagën e mjekut në 1600 euro, pagën e infermierit në 1200 euro, një incentivim i mirë financiar për të zgjedhur sektorin publik shëndetësor. Ndërkohë nga ana tjetër janë kushtet, infrastruktura spitalore dhe jo vetëm, edhe i qendrave shëndetësorë. Ne kemi investuar në 450 qendra shëndetësore për të përmirësuar infrastrukturën shëndetësore”, u shpreh Koçiu.
Ajo shtoi se është investuar shumë edhe në pajisje mjekësore të teknologjisë së lart që i japin mundësi çdo profesionisti të shëndetësisë të diagnostikojë dhe t’i shërbejë pacientit ashtu siç duhet, por edhe të zhvillojë më së miri profesionin e tij.
Më tej, ministrja e Shëndetësisë përmendi edhe një sërë incentivash të reja të cilat mbështesin mjekët dhe infermierët, një ndër to edhe programi për kredi me zero interes.
“Një nga programet më të fundit është ai kredisë me interes zero i cili dha mundësinë që të kishim 85 mjekë për të marrë banesën e tij të parë. Ndërkohë dhamë edhe 45 kuota të tjera për mjekët përfshirë edhe infermierët. Lajmi i mirë tjetër është që jemi duke përgatitur vendimin e radhës për të patur sërish kuota dedikuar mjekëve, infermierëve dhe profesionistëve të shëndetësisë për të marrë kredi me interes zero. Kemi dyfishuar bonusin për ata të rinj të reja mjekë, profesionistë që zgjedhin të shërbejnë edhe në zonat rurale për të dhënë kontributin e tyre dhe për ti shërbyer komunitetin”, nënvizoi Koçiu.
Duke iu drejtuar studentëve praktikantë, Ministrja Koçiu foli dhe për specializimet e tyre në mjekësi.
“Nëse zgjidhni të keni një kontratë me MSHMS, atëherë ju do keni mundësi që gjatë gjithë viteve të specializimit të paguheni me 80% të pagës së mjekut të përgjithshëm. Dhe për ata të rinj dhe të reja që zgjedhin specialitetin mjekësi urgjence apo mjekësi familjare, të cilat për ne janë degë prioritare, kemi dhënë mundësinë që të hyhet pa testimin e formalizuar dhe gjatë kohës që kryejnë specializimin, të paguhen me 100% të pagës së mjekut të përgjithshëm”, u shpreh ajo.
Në përfundim, Ministrja e Shëndetësisë dhe Mbrojtjes Sociale, Albana Koçiu foli edhe për reformën e rëndësishme të autonomisë spitalore e cila u jep mundësi spitaleve që të mos varen vetëm nga buxheti i qeverisë dhe MSHMS-së, por të vetadministrojnë dhe vetëmenaxhojnë buxhetet e tyre, stafet, shërbimet shëndetësore dhe pajisjet e nevojshme që të ofrojnë shërbime të specializuara.
