TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Shtëpia e Bardhë ka kërkuar 152 milionë dollarë për të rikthyer ish-ishullin e burgut të Alcatrazit në detyrë aktive, duke ndjekur thirrjen e presidentit Donald Trump vitin e kaluar për të transformuar destinacionin e njohur turistik të Gjirit të San Franciskos.
Kërkesa është përfshirë në projektbuxhetin për vitin fiskal 2027, i publikuar së fundmi, i cili synon financimin e funksioneve të qeverisë federale. Megjithatë, propozime të tilla për shpenzime konsiderohen si orientuese dhe i nënshtrohen miratimit nga ligjvënësit në Kongres.
Sipas dokumentit, fondet janë parashikuar për Byroja Federale e Burgjeve, me qëllim mbulimin e kostove fillestare për rindërtimin e Alcatrazit në një “burg të sigurisë së lartë me teknologji moderne”.
I vendosur në Gjirin e San Francisco, Alcatrazi u mbyll në vitin 1969 dhe aktualisht administrohet nga Shërbimi i Parqeve Kombëtare si një nga atraksionet më të vizituara turistike në SHBA.
Në muajin maj të vitit të kaluar, Trump deklaroi se kishte udhëzuar institucionet përkatëse, përfshirë Departamentin e Drejtësisë dhe Byronë e Burgjeve, që të punojnë për rihapjen e një Alcatrazi të “zgjeruar dhe të modernizuar ndjeshëm”, i destinuar për të strehuar kriminelët më të rrezikshëm dhe të dhunshëm.
I hapur fillimisht në vitin 1934, Alcatrazi konsiderohej si një nga burgjet më të sigurta në Shtetet e Bashkuara, falë izolimit të tij në ishull, ujërave të ftohta dhe rrymave të forta detare. Zyrtarisht, nuk është regjistruar asnjë arratisje e suksesshme, edhe pse disa të burgosur figurojnë si të zhdukur dhe të supozuar të mbytur.
