TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryeministri spanjoll, Pedro Sanchez deklaroi sot se nuk ka asnjë shqetësim, pas publikimit të një artikulli të Reuters që përmend diskutime në Shtetet e Bashkuara të Amerikës për një pezullim të mundshëm të Spanjës nga NATO-ja, si kundërpërgjigje ndaj kundërshtimit të saj për luftën kundër Iranit.
Asnjë nen i traktatit themelues të NATO-s, i nënshkruar në vitin 1949, nuk parashikon pezullimin apo përjashtimin e një shteti anëtar nga Aleanca, e cila ka qenë shpesh në qendër të kritikave të Donald Trump që prej rikthimit të tij në Shtëpinë e Bardhë më shumë se një vit më parë.
I pranishëm në Nikozia për një samit të liderëve të Bashkimi Evropian, Sanchez u pyet për raportimet se Uashingtoni mund të shqyrtojë pezullimin e pjesëmarrjes së Spanjës në poste drejtuese brenda Aleancës.
”Spanja është një partnere e besueshme në NATO dhe ne përmbushim detyrimet tona”, u shpreh ai në anglisht.
”Pra, nuk ka arsye për shqetësim”, shtoi ai.
”Ne nuk punojmë mbi bazën e e-maileve, por mbi dokumente zyrtare dhe qëndrime që formulon qeveria e Shteteve të Bashkuara”, deklaroi ai më tej në spanjisht.
”Qëndrimi i qeverisë spanjolle është i qartë: bashkëpunim i plotë me aleatët tanë, por gjithmonë në kuadër të ligjit ndërkombëtar”, vijoi ai.
E pyetur për këto raportime, kryeministrja e Italisë Giorgia Meloni bëri thirrje që NATO-ja të mbetet e bashkuar, duke e cilësuar këtë si një nga pikat e saj më të forta.
Ndërkohë, presidnenti Donald Trump nuk reagoi menjëherë.
Por, në një email zëdhënësja e Pentagonit, Kingsley Wilson, theksoi se ”siç ka thënë presidenti Trump, pavarësisht gjithçkaje që Shtetet e Bashkuara kanë bërë për aleatët e NATO-s, ata nuk na kanë mbështetur” gjatë ofensivës kundër Iranit.
Që prej fundit të shkurtit, Pedro Sanchez ka kundërshtuar luftën e ndërmarrë nga Shtetet e Bashkuara dhe Izraeli kundër Iranit, duke u bërë një nga zërat kryesorë në Perëndim kundër përshkallëzimit të konfliktit në Lindjen e Mesme.
Ky qëndrim ka irrituar fort presidentin Trump, i cili ka kritikuar Madridin për refuzimin e lejimit të përdorimit të bazave ushtarake në Andaluzi për sulme ajrore, madje duke kërcënuar me ndërprerjen e çdo tregtie mes dy vendeve.
Prej disa muajsh, Trump gjithashtu i kërkon qeverisë spanjolle që të rrisë shpenzimet e sigurisë në 5% të Prodhimit të Brendshëm Bruto (PBB) deri në vitin 2035, përfshirë 3,5% vetëm për shpenzimet ushtarake, sipas marrëveshjes së arritur në samitin e Aleancës në Hagë.
Nga ana tjetër, Madridi beson se mund të përmbushë objektivat ushtarake të NATO-s duke i kufizuar shpenzimet në 2% të PBB-së.
Sanchez është gjithashtu një nga pak liderët perëndimorë të nivelit të lartë që e ka cilësuar si gjenocid luftën e Izraelit në Gaza, pas ofensivës së Hamasit në tetor 2023.
