TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
NATO ka dënuar shënjestrimin e Turqisë nga Irani pasi një raketë hyri në hapësirën e saj ajrore, duke thënë se qëndron fort me të gjithë aleatët e saj.
“Ne e dënojmë shënjestrimin e Turqisë nga Irani. NATO qëndron fort me të gjithë aleatët, përfshirë Turqinë, ndërsa Irani vazhdon sulmet e tij pa dallim në të gjithë rajonin. Qëndrimi ynë parandalues dhe mbrojtës mbetet i fortë në të gjitha fushat, përfshirë mbrojtjen ajrore dhe raketore”, tha zëdhënësja Allison Hart.
Më herët, Turqia tha se sistemet e mbrojtjes ajrore dhe raketore të NATO-s të vendosura në Mesdheun lindor shkatërruan një raketë balistike të lëshuar nga Irani, e cila kishte hyrë në hapësirën turke pasi kaloi Sirinë dhe Irakun.
Incidenti shënon herën e parë që anëtarja e NATO-s, Turqia, fqinja e Iranit në veriperëndim, përfshihet në konfliktin në zgjerim midis Iranit, SHBA-së dhe Izraelit, i cili deri tani ka prekur disa vende në rajon.
“Ne i paralajmërojmë të gjitha palët të përmbahen nga veprimet që do të çonin në përshkallëzim të mëtejshëm të konfliktit në rajon. Në këtë kontekst, ne do të vazhdojmë të konsultohemi me NATO-n dhe aleatët tanë të tjerë”, tha ministria turke e Mbrojtjes, duke shtuar se nuk pati viktima apo të lënduar.
Ankaraja tha se mbeturinat nga raketa e mbrojtjes ajrore që interceptoi raketën balistike ranë në rrethin Dortyol të provincës Hatay në Turqinë juglindore.
Ministri i Jashtëm turk,Hakan Fidan i përcolli homologut të tij iranian reagimin në shenjë proteste të Ankarasë për hyrjen e raketës balistike në hapësirën ajrore gjatë një telefonate të mërkurën, tha një burim diplomatik turk.
Gjatë telefonatës, Fidan i tha gjithashtu homologut iranian Abbas Araqchi se çdo hap që mund ta zgjerojë më tej konfliktin duhet të shmanget, tha burimi.
