TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një protestues 26-vjeçar iranian pritet të ekzekutohet sot për pjesëmarrjen e tij në protestat antiqeveritare që kanë tronditur Iranin, ndërsa Donald Trump u bën thirrje hapur qytetarëve të “vazhdojnë të protestojnë” dhe premton se “ndihma është në rrugë e sipër”, duke provokuar një reagim të fortë diplomatik nga Teherani.
Presidenti amerikan, në fakt, kur u pyet në një intervistë me CBS në lidhje me ekzekutimin e Soltanit, paralajmëroi masa shumë të ashpra nëse i riu iranian ekzekutohet. “Ne do të marrim masa shumë të ashpra. Nëse ata bëjnë diçka të tillë, ne do të marrim masa shumë të ashpra”, tha ai, ndërsa kur u pyet të sqaronte se çfarë donte të thoshte, Trump iu referua operacionit të fundit të SHBA-së në Venezuelë dhe vrasjes së udhëheqësit të atëhershëm të Shtetit Islamik, Abu Bakr al-Baghdadi, në vitin 2019.
“Ne nuk duam të shohim se çfarë po ndodh në Iran. Dhe, e dini, nëse ata duan të protestojnë, kjo është një gjë. Kur ata fillojnë të vrasin mijëra njerëz kjo është gjë tjetër. Dhe tani po më tregoni për varjet. Do të shohim se si do të funksionojë kjo për ta. Nuk do të funksionojë”, shtoi presidenti amerikan. Sipas organizatës norvegjeze për të drejtat e njeriut Hengaw, Erfan Soltani, nga qyteti Fardis në perëndim të Teheranit, do të ekzekutohet më vonë sot. Soltani u arrestua në lidhje me protestat në qytetin Karaj. Organizata pretendon se familja e tij ishte informuar për dënimin me vdekje, por “ishte mbajtur qëllimisht në errësirë” në lidhje me procesin ligjor. Siç thuhet, “trajtimi i nxituar dhe jo transparent i çështjes rrit shqetësimet se dënimi me vdekje po përdoret si mjet për të shtypur protestat”.
Tregues i mizorisë së regjimit të Teheranit është informacioni nga OJQ-të se Soltani kishte vetëm 10 minuta për t’i thënë lamtumirë familjes së tij, me zyrtarët iranianë të sigurisë që i informuan të afërmit se do të ishte lamtumira e tyre e fundit para se i riu të përballej me ekzekutimin. Sipas organizatës Iran Human Rights (IHR), Soltanit gjithashtu nuk iu lejua qasja në një avokat ose në një gjyq, ndërsa “madje edhe një i afërm i ngushtë që është avokat u pengua dhe u kërcënua nga agjentët e sigurisë kur u përpoq të merrte përsipër çështjen. Ata i thanë: “Nuk ka dosje për të shqyrtuar. Ne kemi njoftuar se kushdo që arrestohet në protesta do të ekzekutohet”.
Presidenti i Shteteve të Bashkuara, Donald Trump, u ka bërë thirrje qytetarëve iranianë të vazhdojnë protestat kundër qeverisë së tyre, gjatë një fjalimi të mbajtur të martën në Michigan.
Trump deklaroi se iranianët duhet të marrin kontrollin e institucioneve dhe të mbajnë mend emrat e personave që ai i cilësoi si përgjegjës për dhunë dhe abuzime, duke shtuar se këta individë do të përballen me pasoja.
Presidenti amerikan përsëriti se SHBA-të do të ofrojnë mbështetje për civilët iranianë që protestojnë kundër autoriteteve, duke theksuar se “ndihma është duke ardhur”.
Në një deklaratë për CBS News, Trump sqaroi se ndihma do të vijë në forma të ndryshme, përfshirë mbështetje ekonomike, duke shtuar se SHBA-të nuk synojnë të ndihmojnë qeverinë iraniane.
Duke iu referuar raportimeve për viktima gjatë protestave, Trump tha se numri i të vdekurve “duket i konsiderueshëm”. Ai paralajmëroi gjithashtu masa të ashpra nëse konfirmohen raportet për ekzekutimin e protestuesve.
“Nëse ndodh një gjë e tillë, SHBA-të do të reagojnë me masa shumë të forta”, tha presidenti amerikan./BBC
