TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kushdo që mendoi se kërkim-falja e BBC-së ndaj Donald Trump do ta ndalte kërcënimin e tij për një padi, gaboi.
Kreu i BBC-së, Samir Shah, e përmblodhi shkurt në intervistën që dha një ditë pasi drejtori i përgjithshëm dhe CEO i lajmeve dhanë dorëheqjen. Ai e quajti presidentin “një njeri që padit shpesh”.
Presidenti, bazuar në intervistën e tij për GB News, dukej qartë i lënduar nga ajo që ai e konsideron si një montazh “skandaloz”, dhe tani ka rritur shumën për të cilën thotë se do të padisë korporatën.
Ndërsa udhëtonte me Air Force One të premten, Trump u tha gazetarëve se shifra do të ishte “nga 1 deri në 5 miliardë dollarë”.
Për ta vendosur në kontekst. Të ardhurat vjetore të BBC-së nga tarifa e licencës vitin e kaluar ishin 3.8 miliardë paund.
Të premten, Trump tha: “Ata ndryshuan fjalët që dolën nga goja ime.” Ai kërkon të dijë pse Panorama ndërtoi dy klipet e fjalimit të tij së bashku për t’i dhënë një “kuptim krejtësisht të ndryshëm”.
Trump nuk pranon përgjigjen e BBC-së se ajo që ndodhi ishte e paqëllimshme.
Ky është një moment shumë serioz në historinë e BBC-së. Ka të bëjë me faktin nëse BBC shihet si e paanshme - një burim i besueshëm në një botë ku besimi te institucionet po bie.
Në vend të kësaj, korporata po akuzohet për të kundërtën — dhe po përballet me një betejë të shtrenjtë dhe shumë publike me njeriun më të fuqishëm në botë.
Që nga moment kur presidenti kërcënoi për herë të parë me veprim ligjor, ishte e qartë se korporata nuk kishte ndërmend t’i ofronte kompensim.
BBC beson se ka një argument që, çfarëdo gabimi të jetë bërë, programi Panorama nuk i ka shkaktuar dëm Trumpit.
Ai u zgjodh president pak pas transmetimit të programit dhe, gjithsesi, thotë BBC-ja, programi nuk u transmetua në asnjë kanal amerikan, pra si mund t’i kishte shkaktuar dëm?
Të gjithë — brenda BBC-së dhe jashtë saj — mendonin se përdorimi i parave të publikut për të zgjidhur çështjen me Trumpin, nuk ishte një opsion i pranueshëm
Siç tha një ish-ekzekutiv i lartë i BBC-së, pasi korporata refuzoi të ofronte kompensim: “Kanë marrë vendimin e duhur.”
Por ai shtoi se, nëse presidenti vendos të padisë, BBC-ja do të duhet të “forcohet dhe të angazhojë avokatët më të mirë në Florida”.
Një zgjidhje pa gjyq do të kishte qenë ulja e kostove afatgjata.
Tani duket se BBC do të përfshihet në një betejë gjyqësore të gjatë dhe të shtrenjtë, në një kohë kur duhet të fokusohet 100% te diskutimet për rinovimin e kartës së saj, (dokumenti ligjor që përcakton funksionimin, qëllimet dhe të drejtat e BBC-së) që po intensifikohen.
Drejtuesit e lartë të BBC-së duhet të përqendrohen plotësisht në atë që, në kohë normale, është një moment thelbësor për korporatën — kur përcaktohet qëllimi i saj, shtrirja, mënyra e financimit dhe detajet e ekzistencës së saj, të gjitha të rishikohen nga qeveria dhe BBC-ja përpara një karte të re që hyn në fuqi në fillim të vitit 2028.
Gjithashtu, korporata po humbet njeriun që do të duhej ta udhëhiqte këtë proces — Tim Davie, drejtorin e përgjithshëm.
Tani drejtuesit e lartë të BBC-së do të shpërndahen për të planifikuar hapat e ardhshëm në një betejë që mund të jetë shumë dëmtuese, madje ekzistenciale, me Donald Trumpin ndërsa tarifat ligjore mund të jenë shumë të shtrenjta.
Gjithçka mund të ishte shmangur nëse BBC-ja do të kishte qenë e hapur për gabimin shumë më herët dhe do ta kishte korrigjuar atë. Në vend të kësaj, ajo përballet me një rrugë të gjatë.
A mund të kërkojë BBC-ja ndërhyrjen e qeverisë britanike?
A do ta bindë një telefonatë e kryeministrit Keir Starmer Trumpin të ndryshojë mendim?
A do të donte Starmer të përfshihej dhe të shpenzonte kapitalin e tij politik me presidentin amerikan?
Një aspekt pozitiv për BBC këtë javë ishte mbështetja e fuqishme e sekretarit të Kulturës, Lisa Nandy, e cila mbrojti korporatën.
Ajo foli për besimin e gjerë që ka publiku te BBC News dhe e përshkroi korporatën si “një dritë për njerëzit në kohë të errëta”, që bashkon vendin.
Donald Trump, nga ana tjetër, e ka quajtur BBC-në “më keq se lajmet e rreme”. Ai pretendon se korporata dhe gazetarët e saj janë të korruptuar.
Beteja është tashmë e hapur dhe serioze.
