TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryebashkiaku i Londrës, Sadiq Khan, ka reaguar ndaj akuzave të ngritura kundër liderit të Reform, Nigel Farage, duke thënë se dëshmitë e më shumë se 20 personave për sjellje raciste dhe antisemitike në vitet e tij të shkollës kanë sjellë në sipërfaqe kujtime të dhimbshme nga e kaluara.
“Të të quajnë ‘P’ në atë moshë nuk të lëndon vetëm, por të ndryshon,” tha ai. “Të ndryshon mënyrën si shqipton emrin tënd. Ndryshon mënyrën si flet me miqtë e tu dhe mënyrën si ecën në rrugë. Këto janë përvoja që nuk i harron kurrë. Ende e kujtoj qartë se si jam ndier.”
Reagimi i tij vjen pasi disa ish-shokë të Farage në Dulwich College rrëfyen për The Guardian se lideri i Reform kishte përdorur gjuhë raciste dhe antisemitike nga mosha 13 deri në 18 vjeç.
Regjisori Peter Ettedgui, sot fitues i çmimeve Emmy dhe Bafta, tregoi se Farage “i afrohej dhe i pëshpëriste: ‘Hitleri kishte të drejtë’ ose ‘Gazojini’, duke imituar madje edhe zhurmën e dhomave të gazit”.
Farage ka mohuar kategorikisht akuzat, ndërsa më pas ka pranuar se mund të ketë thënë gjëra “që sot interpretohen ndryshe”, të cilat i ka cilësuar si “shaka të adoleshencës”.
Khan tha se nuk e kupton pse Farage nuk ka kërkuar falje ndaj personave që pretendojnë se janë abuzuar verbalish nga ai. “Refuzimi i tij për të kërkuar falje flet shumë për karakterin e një njeriu që pretendon se dëshiron të bëhet kryeministër,” u shpreh ai sipas The Guardian.
Kryeministri Keir Starmer, i pyetur për çështjen gjatë një vizite në Bushey United Synagogue, tha se akuzat janë “serioze” dhe kanë ndikim të thellë tek viktimat e racizmit dhe antisemitizmit. “Këto përvoja i shoqërojnë njerëzit për gjithë jetën,” deklaroi ai.
Qeveria ka reaguar ndaj publikimeve, ndërsa Farage ka pohuar se akuzat janë të motivuara politikisht.
