TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryeministrja italiane Giorgia Meloni ka dhënë një intervistë të zgjeruar për edicionin qendror të lajmeve në televizionin “La7”, ku ka komentuar zhvillimet kryesore ndërkombëtare dhe debatet e brendshme politike në Itali.
Meloni hodhi poshtë idenë se marrëdhëniet mes SHBA-së dhe Europës janë përkeqësuar, duke theksuar se diskutimet e fundit për strategjinë e përbashkët transatlantike janë një proces i natyrshëm. “Nuk besoj se marrëdhëniet mes Shteteve të Bashkuara dhe Europës janë krisur. Ajo që diskutohet sot është pjesë e një procesi historik të pashmangshëm. Europa, nëse do të ketë peshë, duhet të jetë në gjendje të mbrojë vetveten dhe jo të varet gjithmonë nga të tjerët”, u shpreh ajo. Sipas Melonit, një autonomi më e madhe evropiane në fushën e sigurisë ka kosto ekonomike, por krijon liri të vërtetë politike.
Sa i përket luftës në Ukrainë, Meloni theksoi se linja e qeverisë italiane mbetet e pandryshuar. “Ne e kemi mbështetur Kievin që në fillim, sepse vetëm kështu mund të ndërtohej një rrugë drejt paqes. Po të mos e kishim mbështetur Ukrainën, pushtimi do të kishte përfunduar dhe nuk do të kishte asnjë proces paqeje. Sot kemi nisur negociata të para falë forcës penguese që u krijua. Pikërisht për këtë arsye, qëndrimi i Italisë nuk duhet të ndryshojë”, deklaroi kryeministrja.
E pyetur për situatën në Lindjen e Mesme, Meloni u shpreh se Italia do ta njohë shtetin e Palestinës vetëm pasi Hamas të jetë çarmatosur dhe të garantohet se nuk do të ketë rol në qeverisjen e Gazës. Ajo njoftoi gjithashtu se në ditët në vijim do të presë në Romë presidentin e Autoritetit Palestinez, Mahmoud Abbas. “Ne kemi qenë të qartë edhe në OKB: Izraeli nuk duhet të pengojë krijimin e një shteti palestinez dhe as të nxisë vendbanime të reja në Bregun Perëndimor. Për këtë arsye kemi nënshkruar Deklaratën e Nju Jorkut për zgjidhjen me dy shtete”, theksoi Meloni.
Në fund të intervistës, kryeministrja komentoi referendumin që pritet të zhvillohet në mars në Itali, i cili synon ndarjen e karrierave të prokurorëve dhe gjyqtarëve. Meloni e cilësoi këtë reformë si “shumë të rëndësishme”, sepse rrit autonominë e sistemit gjyqësor dhe përcakton mekanizma të qartë kontrolli ndaj gabimeve eventuale të gjyqtarëve. Ajo përsëriti se, pavarësisht rezultatit të votimit, nuk do të japë dorëheqjen nga drejtimi i qeverisë.
