TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Të paktën 90 persona kanë humbur jetën nga një shpërthim në një minierë qymyri në veri të Kinës, raportoi BBC.
Shpërthimi i gazit ndodhi në minierën e qymyrit “Liushenyu”, e operuar nga kompania “Tongzhou Group”, në provincën Shanxi.
Qindra forca shpëtimi janë dërguar në vendngjarje. Pamjet e transmetuara nga mediet shtetërore treguan personel të urgjencës, që transportonin barela në zonën e aksidentit, ndërsa ambulancat prisnin në gatishmëri.
Më shumë se 100 persona raportohet se janë dërguar në spital, ndërsa operacionet e kërkim-shpëtimit vazhdojnë ende.
Shpërthimi ndodhi dje në orën 19:29 sipas kohës lokale, në një moment kur në minierë ndodheshin 247 punëtorë.
Pas incidentit, presidenti kinez, Xi Jinping kërkoi që të mos kursehej asnjë përpjekje për trajtimin e të plagosurve dhe kërkimin e të mbijetuarve.
Ai gjithashtu urdhëroi hetim të plotë mbi shkaqet e aksidentit dhe kërkoi që përgjegjësit të vendosen para drejtësisë.
Sipas medieve shtetërore, drejtuesit e minierës janë ndaluar nga autoritetet. Shkaku i shpërthimit ende nuk është bërë i ditur, por raportimet paraprake tregojnë se nivelet e monoksidit të karbonit — një gaz shumë toksik dhe pa erë — kishin tejkaluar kufijtë e lejuar brenda minierës.
Ministria kineze e Menaxhimit të Emergjencave ka angazhuar 345 efektivë nga gjashtë ekipe shpëtimi për të ndihmuar në operacion.
Provinca Shanxi, një nga rajonet më të varfra të Kinës, njihet si qendra kryesore e industrisë së qymyrit në vend.
Në fillim të viteve 2000, aksidentet fatale në minierat kineze ishin të zakonshme. Megjithëse standardet e sigurisë janë forcuar vitet e fundit, incidente të rënda vazhdojnë të ndodhin.
Në vitin 2023, shembja e një miniere të hapur në rajonin verior të Mongolisë së Brendshme shkaktoi vdekjen e 53 personave.
Ndërsa në vitin 2009, një shpërthim në një minierë në provincën Heilongjiang në verilindje të vendit shkaktoi mbi 100 viktima.
Kina mbetet vendi konsumator më i madh i qymyrit në botë dhe njëkohësisht emetuesi më i madh i gazeve serrë, pavarësisht investimeve rekord në energjinë e rinovueshme.
