TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ushtria izraelite njoftoi se pezulloi “përkohësisht” një sulm që do të niste të shtunën, i cili synonte infrastrukturën ushtarake të Hezbollahut, në Libanin jugor.
Një armëpushim ka qenë në fuqi që nga nëntori i vitit 2024, pas më shumë se një viti armiqësish midis Izraelit dhe organizatës libaneze, së bashku me luftën në Rripin e Gazës.
Pavarësisht këtij armëpushimi, Izraeli ka nisur sulme të shumta kundër Libanit, duke pretenduar se po synon anëtarët dhe infrastrukturën e Hezbollahut me qëllim që ta parandalojë atë nga riarmatosja.
Të shtunën e kaluar, ushtria izraelite lëshoi një paralajmërim duke njoftuar një sulm të afërt dhe duke u bërë thirrje banorëve të komunitetit Yanouh, në Libanin jugor, të evakuohen menjëherë.
Zëdhënësi arabishtfolës i ushtrisë izraelite, Avichai Andrai, deklaroi më pas se sulmi ishte “pezulluar përkohësisht”, duke sqaruar megjithatë se forcat e armatosura izraelite “po e monitorojnë ende objektivin”.
Ky vendim u mor pasi ushtria libaneze “kërkoi qasje në zonën në fjalë për të adresuar një shkelje të marrëveshjes së armëpushimit”, shkroi ai në X. Ushtria izraelite “nuk do të lejojë” që Hezbollahu “të ridislokohet ose të riarmatoset”, theksoi Andrai.
Një burim nga shërbimet e sigurisë libaneze vuri në dukje se ushtria fillimisht u përpoq të kontrollonte ndërtesën që ushtria izraelite donte të shënjestronte, por dështoi për shkak të kundërshtimit të banorëve.
Burimi shtoi, duke folur për AFP-në, se ushtria libaneze arriti të kthehej në vendngjarje më vonë dhe të kontrollonte ndërtesën, pasi banorët ndiheshin të “kërcënuar” dhe u larguan nga frika e një sulmi.
Ushtria libaneze duhet të përfundojë shkatërrimin e infrastrukturës ushtarake të Hezbollahut që ndodhet midis kufirit me Izraelin dhe lumit Litani, rreth tridhjetë kilometra në veri, deri në fund të vitit, bazuar në marrëveshjen e armëpushimit.
Një vit më parë, u vu në fuqi një mekanizëm monitorimi i armëpushimit, që përfshinte OKB-në, SHBA-në dhe Francën.
