TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryeministri britanik Keir Starmer, ka reaguar ashpër pas sulmit me thikë në Golders Green, ku 45-vjeçari Essa Suleiman vrau dy burra hebrenj, duke e cilësuar atë si një akt terrorist dhe pjesë të një serie sulmesh antisemitike në rritje në Mbretërinë e Bashkuar.
Në një deklaratë nga Downing Street, Starmer u shpreh se komuniteti hebre është goditur nga “edhe një sulm i neveritshëm”, pasi dy persona u plagosën “vetëm sepse ishin hebrenj”.
Ai theksoi se ky nuk është një incident i izoluar, por pjesë e një prirjeje shqetësuese. “Hebrenjtë sot kanë frikë të tregojnë identitetin e tyre, të shkojnë në sinagogë, në universitet apo të dërgojnë fëmijët në shkollë. Askush nuk duhet të jetojë kështu në Britani, por ata po jetojnë,” deklaroi kryeministri.
Sipas tij, ngjarja e fundit e ka çuar këtë frikë në një nivel tjetër. “Dje, ky ankth u shndërrua në terror. Kjo është fjala e duhur,” tha Starmer.
Kreu i qeverisë njoftoi një sërë masash për të përballuar situatën, përfshirë rritjen e pranisë së policisë në zonat e ndjeshme, shtimin e fondeve për sigurinë e komunitetit hebre dhe fuqizimin e ligjeve për mbylljen e organizatave që nxisin ekstremizëm antisemitik.
Gjithashtu, ai paralajmëroi ndalim hyrjeje për “predikuesit e urrejtjes” dhe përjashtimin e tyre nga universitetet dhe hapësirat publike në vend. Në fokus do të jetë edhe përshpejtimi i procedurave gjyqësore për rastet e sulmeve antisemitike, ndërsa Starmer përmendi edhe nevojën për masa më të forta kundër ndikimeve nga shtete si Iran.
Ai kritikoi gjithashtu disa qëndrime në protestat pro-palestineze, duke theksuar se liria e shprehjes nuk duhet të kthehet në mbështetje për dhunën. Sipas tij, thirrje të tilla si “globalizoni intifadën” përbëjnë nxitje për terrorizëm dhe duhet të ndiqen penalisht.
Starmer pranoi se situata ka krijuar pasiguri te komuniteti hebre, duke i bërë ata të ndihen të kërcënuar dhe të pasigurt për vendin e tyre në shoqëri.
I pyetur për reagimet kundërshtuese gjatë vizitës së tij në Golders Green, ai tha se e kupton nivelin e lartë të shqetësimit dhe se qeveria ka ndërmarrë hapa konkretë, përfshirë mbledhjen emergjente të COBRA për koordinimin e reagimit institucional.
Në përfundim, Starmer paralajmëroi se do të shqyrtohen masa të tjera lidhur me protestat, përfshirë kontrollin e thirrjeve dhe pankartave, si dhe menaxhimin e përsëritjes së tyre.
