LEXO PA REKLAMA!

SHKARKO APP

App Store
Google Play
MERR NJOFTIME NGA TPZ.AL
NDIQ TPZ NE YOUTUBE NDIQ TPZ NE FACEBOOK

TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.

FLASH!

BOTA, 6 Mars 2026, 15:24

Gjigandi gjerman i mediave “Axel Springer”, blen gazetën britanike “Daily Telegraph” për 663 milionë euro

TPZ

Gjigandi gjerman i mediave “Axel Springer”, blen gazetën

Grupi gjerman i mediave Axel Springer ka rënë dakord të blejë gazetën britanike “The Daily Telegraph” për 663 milionë euro, njoftuan sot (6 mars) kompanitë.

Sipas informacioneve të Associated Press, marrëveshja i jep fund një mosmarrëveshjeje të gjatë mbi pronësinë e “Telegraph Media Group”, i cili boton gazetën “The Daily Telegraph”,  me një histori prej 171 vitesh, si dhe një tjetër gazetë që publikohet çdo të diel.

Axel Springer theksoi se do të investojë në grup për ta shndërruar atë në “median kryesore të qendrës së djathtë në botën anglishtfolëse” dhe për të përshpejtuar zgjerimin e saj në tregun e Shteteve të Bashkuara.

“Para më shumë se 20 vitesh u përpoqëm të blinim Telegraph, por nuk ia dolëm. Tani ëndrra jonë bëhet realitet”, deklaroi drejtori ekzekutiv i kompanisë, Mathias Döpfner.

Kompania gjermane zotëron edhe tituj të tjerë të rëndësishëm mediatikë, si gazetat “Bild” dhe “Die Welt”, si dhe platformën e informacionit politik “Politico”. Marrëveshja vjen pas vitesh pasigurie për të ardhmen e gazetave dhe rrëzon një ofertë konkurruese nga pronari i “Daily Mail” për blerjen e titujve të Telegraph.

U nxor në shitje në vitin 2023 për të shlyer borxhet

“Telegraph Media Group”, që më parë i përkiste familjes britanike “Barclay family”, u nxor në shitje në vitin 2023 për të ndihmuar në shlyerjen e borxheve të kësaj familjeje.

Një ofertë për blerjen e publikimeve erdhi edhe nga “RedBird IMI”, një konsorcium i mbështetur nga “RedBird Capital Partners” dhe Sheikh Mansour bin Zayed Al Nahyan, anëtar i familjes mbretërore të Abu Dhabit dhe zëvendëspresident i Emirateve të Bashkuara Arabe.

Megjithatë, konsorciumi u tërhoq në vitin 2024 pas reagimit të fortë të qeverisë britanike, e cila miratoi legjislacion për të penguar pronësinë e mediave britanike nga shtete të huaja.

Ndërkohë, revista e djathtë “The Spectator”, që më parë i përkiste grupit Telegraph, u shit veçmas në vitin 2024 te investitori britanik i hedge fundeve Paul Marshall.