TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Të paktën 23 persona janë shoqëruar nga policia, pas protestës së PD, të mbajtur këtë të diel në Tiranë.
Protesta e opozitës zgjati rreth 2 orë. Kreu i PD Sali Berisha i shoqëruar nga deputetë të opozitës, mbështetës e qytetarë, marshuan në disa institucione kryesore, ndërsa ndaj Kryeministrisë u hodhën molotovë e fishekzjarrë. Policia u kundërpërgjigj duke hedhur gaz lotsjellës, spray e ujë me autobotë për të shpërndarë protestuesit.,
Ndërkohë sipas njoftimit zyrtar të Policisë, gjashtë efektivë morën lëndime dhe u transportuan te Trauma dhe ndodhen jashtë rrezikut për jetën.
Njoftimi
Gjatë tubimit të zhvilluar nga subjekti politik Partia Demokratike, i cili u përshkallëzua në akte dhune ndaj forcave të rendit, u lënduan 6 punonjës policie.
Të dëmtuarit, përkatësisht efektivë të Forcës së Posaçme “Shqiponja”, Forcës Kombëtare të Sigurisë dhe Policisë Rrugore, po marrin ndihmë mjekësore në Spitalin e Traumës dhe në QSUT.
Gjendja e tyre shëndetësore është e stabilizuar dhe ata ndodhen jashtë rrezikut për jetën, nën kujdesin e mjekëve.
Policia e Shtetit, gjatë tubimit u bëri thirrje, nëpërmjet Qendrës së Zërit, pjesëmarrësve në tubim të mos ushtronin akte dhune dhe të mos sulmonin punonjësit e Policisë me bomba molotovë dhe lëndë piroteknike, por një pjesë e pjesëmarrësve sulmuan punonjësit e Policisë.
Policia e Shtetit kishte marrë masa për ruajtjen e institucioneve, rendit dhe sigurisë publike dhe mbetet tërësisht e angazhuar, për të garantuar ushtrimin e së drejtës qytetare për të protestuar.
Njëkohësisht, dënon me forcë aktet e dhunës së përsëritur ndaj punonjësve të Policisë në krye të detyrës, si dhe ndaj institucioneve shtetërore.
