TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Komisioni Hetimor për sistemin TIMS, me kryetar Ervin Salianjin, nisi punën të martën dhe do të ketë 4 muaj afat për të konkluduar punën e tij.
Salianji ka prezantuar planin e punës si edhe listën e dëshmitarëve që do të thirren para hetimorit.
Sipas planit, si dëshmitarë do të thirren emra të lartë titullarësh si, kryeministri Edi Rama, ministri i Brendshëm Taulant Balla dhe paraardhësi i tij, Bledi Çuçi u kërkuan nga opozita për të dëshmuar para komisionit hetimor parlamentar.
Mirëpo, mazhoranca bëri një kundërpropozim duke kërkuar që në cilësinë e personave që kanë dijeni, nisur nga denoncimet publike, të dëshmojnë edhe Sali Berisha, Lulzim Basha e Gazment Bardhi. Kërkesë e cila duket se ka gjetur dakordësinë e kryetarit të komisionit, Salianji.
“Komisioni rezervon të drejtën që ne Planin e Hetimit të thërrasë për të dëshmuar çdo person apo funksionar tjetër që ka dijeni rreth objektit të hetimit, dhe që rezulton i përfshirë në këtë çështje nga shqyrtimi i dokumentacionit zyrtar”, thuhet në shkresën e firmosur nga Ervin Salianji.
Hetimi konsiderohet i hapur dhe Komisioni do të përfundojë veprimtarinë e tij brenda afatit të caktuar me vendim të Kuvendit 21 Korrik 2024.
“Mbi bazën e Planit Paraprak të Hetimit dhe propozimet e ekspertëve ligjorë, Kryetari i propozon Komisionit për miratim projektvendimin “Për miratimin e Planit të Hetimit të Komisionit Hetimor” brenda afateve të parashikuara nga ligji. Me qëllim hartimin e Planit të Hetimit dhe realizimit të veprimeve të përcaktuara në këtë Plan Paraprak Hetimi, Komisioni, nëpërmjet Kryetarit, mund të kërkojë të dhëna dhe dokumente të tjera nga titullarët e institucioneve publike, si dhe të kryejë çdo veprim sipas nenit 15 dhe 17 të ligjit nr. 8891, datë 02.05.2002 “Për organizimin dhe funksionimin e Komisioneve Hetimore të Kuvendit””, thuhet në planin e detajuar hetimor të komisionit parlamentar të TIMS-it.
