TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Që prej shtatorit, dhjetëra mësues të zonës së Roskovecit nuk marrin lekët e transportit.
Përfaqësues së sindikatës së mësuesve deklaruan sot se do të nisin grevën duke e përshkallëzuar deri në pezullim të plotë të mësimit nëse nuk marrin përgjigje për këtë problematikë.
Janë 12 milionë lekë të vjetra që ZVA Roskovec nuk i ka paguar për transportin e mësuesve duke përfshirë edhe pagesën e vështirësisë në punë. Desdemona Karafili, nënkryetare e sindikatës së mësuesve, tha se për këtë problematikë kanë nisur një letër dhe në kryeministri.
“Ne kemi që në shtator që na mbahen lekët e rrugës. Unë jam pjesë e sindikatës dhe në përfaqësi të mësuesve, kemi kryer veprimet tona dhe do ta përshkallëzojmë situatën duke kaluar deri në grevë nëse lekët e rrugës tonë do të mbahen. Është një procedurë e jashtëligjshme.
Në shtator deri në dhjetor i bjer deri në 12 milionë lekë të vjetra që mbahen për të gjithë mësuesit e zonës. Ne kemi çuar këtë letër me një peticion prej 34 firmash të mësuesve. Kemi çuar në organet kompetente në ZBA-në e Roskovecit, kemi çuar letër dhe në kryeministri.”, tha Karafili.
