TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryetarja e degës nr. 9 të Partisë Demokratike në Tiranë, Eda Grimci, deklaroi se shpopullimi që po përjeton Shqipëria përbën një tragjedi. Gjatë fjalës së saj në protestën e opozitës, ajo theksoi se kjo protestë është zëri i një populli të vjedhur që ngrihet kundër padrejtësisë.
Grimci akuzoi kryeministrin Edi Rama se u ka marrë shtëpitë qytetarëve, i ka arrestuar për çështje si energjia dhe uji, si dhe, sipas saj, i ka mashtruar me premtimet për integrimin në Europë.
Në fjalën e saj, Grimci iu drejtua qytetarëve, nënave, prindërve dhe të rinjve, duke e cilësuar praninë e tyre në protestë si një akt guximi dhe vendosmërie për të mos heshtur më. Ajo u shpreh se protestuesit përfaqësojnë zërin e atyre që nuk mund të flasin dhe ndërgjegjen e një populli që nuk pranon të nënshtrohet.
Ajo theksoi se ishte në protestë si nënë dhe bijë, duke ngritur shqetësimin për largimin e të rinjve nga vendi dhe për vështirësitë që përballin familjet shqiptare. Grimci u bëri thirrje nënave të reagojnë për të ardhmen e fëmijëve të tyre dhe qytetarëve të mos pranojnë më, sipas saj, padrejtësitë dhe keqpërdorimin.
Duke iu drejtuar të rinjve, ajo i cilësoi si shpresa dhe energjia e vendit, ndërsa i nxiti të mos largohen nga Shqipëria dhe të reagojnë për të mbrojtur ëndrrat dhe të ardhmen e tyre. Sipas Grimcit, fenomeni i emigrimit, mungesa e meritokracisë dhe presionet politike në arsim janë shenja të një krize të thellë.
Ajo akuzoi gjithashtu institucionet për përdorim të dhunës ndaj protestuesve dhe theksoi se pushteti, sipas saj, vepron nga frika e reagimit qytetar. Grimci u shpreh se ndryshimi do të vijë vetëm përmes bashkimit dhe reagimit të qytetarëve.
Në fund, ajo iu drejtua edhe kreut të Partisë Demokratike, Sali Berisha, duke theksuar se qytetarët kërkojnë një opozitë të vendosur, që nuk bën kompromis me të keqen. Grimci e mbylli fjalën me thirrjen për bashkim dhe ndryshim, duke theksuar se Shqipëria u përket qytetarëve dhe meriton më shumë dinjitet.
