TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Detaje të reja kanë dalë në dritë nga tragjedia në Vjenë, Alsergrund që u mori jetën tre shqiptarëve të Kosovës dhe një boshnjaku.
Gjatë punimeve në një kantier në Porzellangasse, skela u shemb dhe ata mbetën nën rrënoja e betonin ende të pangurtësuar, raporton Heute.
Ndihma erdhi shumë vonë dhe të katërt humbën jetën. Një punëtor tjetër, për të cilin thuhet se është nga Maqedonia e Veriut, u plagos rëndë dhe iu dorëzua shërbimit të urgjencës. Ai vazhdon të trajtohet në një spital në Vienë.
Një banor i zonës tregoi për “Kronen Zeitung” momentet dramatike menjëherë pas shembjes: “Ishte një zhurmë jashtëzakonisht e fortë, pastaj dëgjova vetëm britmat e punëtorëve. Më pas u ndezën sirenat.”
Betoni i pangurtësuar u hoq me dorë
Zjarrfikësit kanë thënë se punimet për shpëtimi e tyre ishin jashtëzakonisht të vështira. Oborri i ngushtë e vështirësoi ndjeshëm qasjen tek të bllokuarit. Niveli i alarmit u rrit shpejt në 2 dhe u kërkuan forca shtesë.
Për të arritur tek punëtorët, fillimisht u krijuan disa hyrje. Gardhe dhe dyer u hoqën, ndërsa ekipet filluan të largojnë pjesët e shembura të skelës dhe formimit, si dhe armaturat e hekurta. Veçanërisht i vështirë ishte largimi i betonit ende të lëngshëm që u krye me dorë.
Rreth 120 forca me rreth 30 automjete të zjarrfikësve dhe mbrojtjes civile ishin në vendngjarje.
Qentë kërkuan nën rrënoja
Gradualisht u nxorën dy nga punëtorët e bllokuar, por u konstatuan të vdekur. Për të nxjerrë dy viktimat e tjera, duhej të hiqeshin pjesë të tjera të rrënojave të bllokuara. Vetëm pas kësaj ishte e mundur të vazhdohej largimi i betonit që tashmë po ngurtësohej. Rreth dy orë e gjysmë pas fillimit të ndërhyrjes, edhe dy të tjerët u nxorën të vdekur.
Ambasada e Kosovës në Austri ka reaguar zyrtarisht duke konfirmuar se Pajtim Barjami, Asllan Musli dhe Istref Zekaj ishin qytetarë të Kosovës.
“Ambasada e Republikës së Kosovës në Austri shpreh dhimbjen e thellë dhe ngushëllimet më të sinqerta për familjet e viktimave, si dhe për të gjithë ata që janë prekur nga kjo tragjedi. Jemi në komunikim të vazhdueshëm me autoritetet austriake dhe po ndjekim nga afër çdo zhvillim lidhur me rastin. Në të njëjtën kohë, jemi të angazhuara për të ofruar të gjithë mbështetjen e nevojshme për familjarët e viktimave”, thuhet në njoftim.
Ngjarja tragjike u regjistrua pasditen e së martës në zonën e Alsergrundit dhe u përshkrua nga dëshmitarët si një skenë dramatike.
Sipas mediave austriake, incidenti ndodhi rreth orës 14:00 në oborrin e një ndërtese banimi në rrugën Porzellangasse. Gjatë punimeve për betonimin e një papafingoje, skela dhe struktura mbajtëse u shembën, në momentin kur pesë punëtorë ndodheshin mbi to.
Zëdhënësi i zjarrfikësve bëri të ditur se pjesa e sapobetonuar u rrëzua në mënyrë të menjëhershme, duke i tërhequr punëtorët poshtë dhe duke i zënë nën një sasi të madhe betoni dhe materialesh ndërtimi.
Banorët e zonës treguan për momentet e tmerrit. Një prej tyre rrëfeu se fillimisht dëgjoi një zhurmë shumë të fortë, e më pas britmat e punëtorëve, ndërsa pak sekonda më vonë u dëgjuan edhe sirenat e emergjencës.
Ngjarjen e pa nga afër edhe një operator vinçi, i cili ndodhej në kabinën e tij në lartësi dhe nuk kishte mundësi të ndërhynte.
Operacioni i kërkim-shpëtimit u përball me vështirësi të mëdha, pavarësisht angazhimit të mbi 100 efektivëve të zjarrfikësve, policisë dhe shërbimit mjekësor. Terreni i pasigurt, betoni i freskët dhe rrënojat e paqëndrueshme e bënë ndërhyrjen të rrezikshme, duke detyruar ekipet të punonin në disa raste edhe me duar.
Pas rreth një ore e gjysmë kërkimesh, ekipet arritën të nxjerrin të gjallë një 45-vjeçar, i cili u transportua menjëherë në spital me dëmtime të rënda në kokë, thyerje në gjymtyrë dhe probleme serioze në shtyllën kurrizore.
Fatkeqësisht, për katër punëtorët e tjerë nuk pati shpëtim, pasi ata humbën jetën nën rrënoja.
Autoritetet vijojnë hetimet për të zbuluar shkaqet që çuan në shembjen e papritur të strukturës.
Identitetin e një prej viktimave e konfirmoi kryetarit të Komunës së Skenderajt, Sami Lushtaku.
“Me dhimbje të thellë mora lajmin për ndarjen tragjike nga jeta të bashkëkombasit tonë, Pajtim Bajrami nga Klina e Poshtme, i cili humbi jetën në vendin e punës në Vjenë të Austrisë. Kjo humbje e rëndë na prek të gjithëve duke lënë pas një boshllëk të madh në familje, shoqëri dhe te të gjithë ata që e njohën. Ngushëllimet më të sinqerta i shpreh familjes Bajrami, si dhe familjeve të tre bashkëkombasve të tjerë që humbën jetën po në këtë tragjedi”.
