Manaj me një tjetër dygolësh për Barcelona B

Fundjava e sulmit kuqezi në Europë ka vazhduar me gola të tjerë për lojtarët që janë në planet e trajnerit Edi Reja për ndeshjet e muajit mars. Pas Sokol Çikalleshit, Myrto Uzunit dhe Armando Brojës, radhën e kishte një nga të preferuarit e trajnerit, Rei Manaj. Ky i fundit ka kontribuuar me dy gola në suksesin e thëllë 6-0 të Barcelonës B, e cila e sheh veten përsëri në garë për ngjtijen në La Liga 2.

Në fillim të edicionit, Barcelona B hoqi dorë nga plani për t’u ngjitur një kategori më lart, pasi të gjithë talentet e akademisë kaluan te ekipi i parë ose u huazuan në klube të tjera. Manaj mbeti pjesë e ekipit meqë nuk u gjet një blerës për sulmuesin shqiptar me shifrat që kërkonin katalanasit. Por ekipi po bën mirë, ndoshta edhe më mirë se në edicionin e kaluar dhe tani e sheh veten plotësisht në garë për ngjitjen një nivel më lart.

Kjo është padyshim edhe meritë e Manajt, i cili po shënon me rregullsi të admirueshme dhe po e shtyn këtë ekip drejt vendeve në play-off për ngjitjen. Sot, përballë Hospitalet, Manaj shënoi dy gola në suksesin e thellë 6-0. Ai realizoi golin e parë të sifdës me një gjuajtje me kokë, e pastaj atë të 3-0 me një penallti në fundin e pjesës së parë.

Kjo fitore çon Barcelonën B në vendin e tretë, në grupin e skuadarve që tentojnë ngjitjen më lart, por sigurisht ishte e rëndësishme për Manajn, i cili tregoi se po bën atë për të cilën Barcelona e kishte kontraktuar një vit më parë.