Rakacolli: Pasja e Covid nuk do të thotë se vdekja ka ardhur nga Covid

Një debat publik ka nisur pas deklarimit të kryetarit të PD-së Lulzim Basha, se qeveria ka fshehur shifrat reale të vdekjeve nga Covid.

Autoritetet e kanë mohuar këtë fakt, ndërkohë që një tjetër diskutim është ngritur mbi mënyrën se si bëhet raportimi i shifrave dhe si përpilohen skedat e vdekjes së pavientëve.

Në emisionin “Opinion”, Zv.Ministrja e Shëndetësisë Mira Rakacolli tha se edhe pse mund të kenë patur Covid, pacientët nuk do të thotë se kanë vdekur nga Covid.

“Pasja e infeksionit Covid nuk do të thotë patjetër që vdekja ka ardhur nga sëmundja Covid dhe këtë e thotë në grup gjithë personeli mjekësor që ka punuar”, u shpreh Rakacolli.

Ndërsa në emisionin “Opinion” u publikua edhe udhëzimi i OBSH për përcaktimin e vdekjeve për shkak të Covid, Rakacolli tha: “Fakti që ka përcaktime të OBSH, do të thotë që ka debate”.

Më tej, Zv.Ministrja tha se vdekjet e çertifikuara Covid janë ato që janë raportuar.

“Vdekje të ardhura nga raste të çertifikuara Covid 19, janë ato që ka raportuar Ministria e Shëndetësisë”, tha Rakacolli.