X

“Maskat” që nuk fshehin dot më dështimin


Nga Briseida Shehaj

Të enjten e 8 tetorit, Kryeministri i vendit dhe Ministrja e Shëndetësisë dolën në një komunikim publik për të njoftuar shqiptarët se maska tashmë bëhet e detyrueshme në ambjente të mbyllura e të hapura. Përjashtim nga ky rregull përbëjnë vetëm baret dhe restorantet.

Përgjatë fundjavës, ekspertët shpjeguan me fakte e logjikë, sqaruan opinionin, se përse ky vendim i menjëhershëm, arbitrar e jo organik në raport me masat ekzistuese nuk mund të jetë efektiv e në mbrojtje të shëndetit të qytetarëve, por zërat e tyre nuk u konsideruan nga vendim-marrësit.

Në interesin e kesaj filozofie qeverisjeje është të hedhë një gur dhe të gjithë ta ndjekin pas, për të mos u marrë me radhën e pafundme të problemeve reale të shqiptarëve nga varfëria, mungesa e sigurisë, kriza ekonomike, borxhet me breza, shpopullimi, izolimi, etj, etj, etj.

Paradoksalisht, nëse sot klikon në faqen online të ministrisë së shëndetësisë, protokollet nuk kanë ndryshuar, që nga koha kur sipas kryeministrit, maska nuk duhej vendosur në ambjente të hapura.

Paradoksalisht, lokalet, baret, restorantet e qendrat tregetare janë ambjentet më të riskuara, por këto janë të paprekshme, për to masat nuk vlejnë e aq më pak maskat, sepse trazohen “miqtë” e pushtetit.

Por shqetësimi më i madh nuk buron nga paradokset, që janë simptoma e vijueshme e “virusit” rilindas, por mungesa e një fature financiare nga ana e kreut të qeverisë, që me lehtësinë e papërballueshme të facebook-ut dhe batutave çon drejt greminës një vend.

Sa do t’u kushtojë shqiptarëve kjo marrëzi e radhës, që nuk i del fundi?

Pak ditë më parë, Banka Botërore (meqënëse citojmë të huaj si më të besueshëm edhe pse realiteti që shohim me sytë tanë është edhe më keq) publikoi një raport ku theksohej  se 41% e shqiptarëve jetojnë në varfëri. Pra gati gjysma e popullsisë jeton me më pak se 600 lekë në ditë. Sipas statistikave zyrtare,

66 mijë familje marrin ndihmë sociale e cila nuk i kalon 10 mijë lekë në muaj. Por kjo ndihmë më shumë nuk jepet, kriteret e vendosura janë skandaloze. Më konkretisht, nëse në shtëpi ke nje televizor, apo një frigorifer (që zakonisht janë të dhuruara nga shoqata bamirëse e në më të shumtën e rasteve perfundojnë si dollap) nuk e përfiton ndihmën ekonomike.

Thënë këtë, le t’i rikthehemi arsyes kryesore të këtij shkrimi.

Maska më e thjeshtë, ajo kirurgjikale kushton 80 lekë. Me llogari të thjeshtë, një familjeje me 4 persona, që e ndërron këtë maskë çdo ditë do t’i duhen 9600 lekë në muaj. Pra 41% e shqiptarëve nodhen totalisht në pamundësi financiare për të përballuar vendimin e Kryeministrit.

Pensionistët totalisht në pamundësi.

Punonjësit me paga minimale totalisht në pamundësi.

Dhe në vështirësi serioze ata me paga të ulta e mesatare.

Atëherë lind pyetja…për çfarë arsyeje e mori këtë vendim kryeministri, vendim sa jo efektiv sipas ekspertëve për mbrojtjen nga covid-19, aq edhe të papërballueshëm financiarisht për shumicën e shqiptarëve?

Për të vendosur ca gjoba, që me gjasë do të falen në mars? Siç fali të marsit në tetor? Për të mbushur buxhetin, pas zbrazjes nga falja e gjobave të marsit? Për të rënduar faturën e dritave, duke qeverisur vetëm nëpërmjet ndëshkimit të më të pafuqishmëve e më të varfërve?

E vërteta klithëse është se kjo lloj mase nuk ndihmon e mbron askënd dhe nuk arrin të edukojë një publik të tërë për rrezikshmërinë ndaj covid 19. Protokolli i Ministrisë së Shëndetësisë e thotë qartë se maskën më të lirë, atë kururgjikale minimalisht duhet ta ndërrojmë 3 herë në ditë, që të jetë efektive për mbrojtjen nga covidi. Pra vetëm shpenzimi mujor do arrijë gati 30 mijë lekë.

Si përfundim, ne nuk do të ruhemi nga covid-19, por nga gjoba dhe kjo do të detyrojë shumicën e shqiptarëve të mbajnë një maskë sa për t’ja “hedhur” një gjobe të majme nga ana e qeverisë, duke sëmurur veten për t’u dukur se zbatojmë rregullat.  Atëherë kujt i shërben ky vendim absurd i qeverisë? Qytetarit jo, shëndetit të tij aq më pak, përhapjes së pandemisë jo…nuk do shumë mend për t’u kuptuar se përtej shashkës së radhës për të hequr vëmendjen nga skandalet e panumërta, Rilindja me një gur shënjestron edhe zogun tjetër, të majmë “mikun” e radhës me një tender shumë milionësh. T’u fusësh duart në xhep shqiptarëve, për të mbushur “thasët” e një grushti njerëzish është e rëndë, por t’u rrezikosh shëndetin për të ngopur të pangopshmit është kriminale.

* Për më shume bashkohuni në grupin tonë: https://www.facebook.com/groups/tpz.al/
More in BLOG, LAJME
“Kalçeto dhe kafe më të lirë”, kërkesat e të burgosuve në Peqin: Të hiqet dënimi i përjetshëm

Zbardhen kërkesat e të burgosurve të cilët u futën në grevë urie në burgun e Peqinit. Në shkresën dërguar drejtorit...

Close