X

Rama, Meta dhe Berisha, ka ardhur koha që të largoheni!


Nga Mustafa Nano

Po e nis me një pyetje që po jua bëj juve. Çfarë keni bërë mbrëmë pas orës 09:00? Keni parë televizor? Nëse po dhe me siguri që po, atëherë jeni gjendur pa vullnetin tuaj në një dhunë televizive të paparë. Edi Rama, Sali Berisha dhe familja Meta, Lulzim Basha i shkretë nuk ekziston fare në këtë dynja. Rama, Berisha dhe Meta, madje  edhe Kryemadhi, por po e lë mënjanë për t’i bërë shoqëri Bashës, këta kanë qenë mbrëmë në studiot televizive të vendit. Dhe secili prej tyre ka qenë të paktën 2 orë e gjysmë dhe kjo ka qenë një dhunë psikologjike, sipas meje e ngjashme me atë policore.

Unë, duke qenë se jam këtu, duhet t’u bëj apel këtyre xhentëlmenëve. Apeli im është ky: Zotërinj, mendoni largimin, dhe me këtë kam parasysh të na hiqeni sysh, duke ju uruar shëndet të plotë!

Keni 30 vjet që jeni në pushtet dhe keni ushtruar përgjegjësitë më të mëdha politike në këtë vend, atë të Presidentit, Kryeministrit, kryetarit të bashkisë. Keni pasur pushtet absolut. Ju nuk keni qeverisur, keni sunduar. Pikërisht se keni pasur pushtet absolut, ju i keni bërë këtij vendi dëme të pallogaritshme. Ju nuk keni bërë kurrë gabimin të mos bëni një gjë të gabuar. Po e përsëris se kjo që thashë më duket shumë e saktë: Ju nuk keni bërë kurrë gabimin të bëni një gjë të gabuar. Dhe kjo është arsyeja e parë pse ju duhet të largoheni.

Unë do them një 3-4 arsye, jo me gjuhën tuaj. Arsyeja e dytë është se ju nuk jeni njerëz të lirë. Ju nuk jeni më njerëz të lirë më, se ndoshta edhe mund të keni qenë. Ju jeni robër të miqësive, që janë të çuditshme dhe të dyshimta. Ju jeni robër të ambicies dhe tahmasë për pushtet.

Një arsye e tretë është kjo. Ju keni promovuar në vijimësi, keni dhuruar përgjegjësi dhe poste publike për njerëz që nuk kanë pasur moral. Kanë qenë hiçër dhe kanë mbetur hiçër. Me këtë që keni bërë, i keni bërë një dëm të madh vendit, sidomos rinisë. Mund të lodheni, mund të djersiteni, ju mund të studioni shumë, në universitete të mira, por nuk kanë rëndësi këto gjëra. Nëse doni të bëni karrierë politike në Shqipëri dhe administratë, ju duhet të keni vetëm një gjë në CV tuaj, aftësinë për të na u qurravitur neve. Që me fjalë të tjera duhet të bëheni anëtarë të forumeve rinore të partive, të FRPD, FRESS. Ndryshe nuk keni për të bërë hajër. Ky ka qenë mesazhi që ju u keni përcjellë të gjithëve, sidomos të rinjve dhe të rejave. Kjo është arsyeja kryesore, për të mos thënë e vetmja që të rinjtë duan ta lënë këtë vend.

Një arsye të katërt, po e bëj në formë pyetjeje. Nëse ju largoheni sot, ma vini veshin mua, dhe largoheni, çfarë mbetet prapa, cila është vepra juaj? Po jua them unë. Nuk mbetet asgjë, me përjashtim të ndonjë ure, rruge apo shkolle. Asgjë tjetër, në lëmin e shtetformimit keni bërë vetëm dëme, nuk keni bërë reforma të mëdha. Edhe atë në drejtësi ju e keni katranosur rrugës. Berisha dhe Meta e kanë bërë nëpërmjet sabotimit të qartë, ndërsa socialistët e kanë bërë duke thënë në publik kur u janë drejtuar kundërshtarëve, ‘ja po bëhet SPAK, ku do shkoni ju’. Duke krijuar idenë që SPAK dhe Reforma në Drejtësi janë bërë për të ndëshkuar kundërshtarët e socialistëve.

Ju keni ngritur gjëra të çmontueshme dhe ky është dëmi i madh që i keni bërë vendit. Çdo gjë që keni ngritur, çdo institucion e keni ngritur për ju vetë dhe për njerëzit tuaj. I keni bërë gjërat të çmontueshme. Dhe pasi është bërë alternimi në pushtet me kundërshtarët tuaj, kundërshtari, me të ardhur në pushtet, gjëja e parë që ka bërë dhe më e lehta ka qenë të çmontojë atë të ngritur prej jush.

E mbani mend kur erdhën socialistët në pushtet? Demokratët, me t’u larguar, filluan menjëherë dhe u futën në binarë opozitarë dhe u morën me çdo gjë. Por nuk ngritën zërin kur qeveria filloi të mbushë administratën publike me militantë të PS-së, sepse këtë gjë e konsideronin normale, se e kishin bërë vetë para tyre. Dhe u duhet ta bëjnë prapë kur të vijnë.

Janë dëgjuar disa zëra të rëndësishëm këto ditë pas prishjes së Teatrit dhe ato zëra na kanë thënë, janë zëra të rëndësishëm të opozitës, dhe kanë bërë premtimin qesharak, të çmendur: Që me të ardhur në pushtet, sapo të punësojmë militantët tanë, të rrëzojmë Teatrin e ri, që ndërkohë do jetë ndërtuar ai i Edi Ramës dhe do ndërtojmë teatrin e vjetër ashtu siç ishte.

Kjo është çmenduri dhe unë nuk kam fjalë për ta përkufizuar këtë lloj premtimi. Këto janë arsyet që më bënë mua të bëj këtë apel, që po e përsëris: Filloni dhe mendoni zotërinj, Rama, Berisha dhe Meta, largimin tuaj nga politika. Është koha që ta bëni, madje koha ka kohë që ka qenë.

Monolog nga emisioni “Provokacia”

* Për më shume bashkohuni në grupin tonë: https://www.facebook.com/groups/tpz.al/
More in BLOG
Gazetari Balla dhe Rama luajnë tragjikomedi në teatrin e Operas dhe Baletit

Nga Ilir Demalia Dje me scenografi të mirëmenduar nga kryeministri Edi Rama, të dirigjuar nga Sokol Balla më lojën e...

Close