Telefonata e banorëve çon në pranga 27 vjeçarin, sapo kishte hyrë në banesën e të moshuarit për të…

Telefonata e banorëve në një lagje të Tiranës, ka bërë të mundur arrestimin e një grabitësi që po tentonte të vidhte në banesën e një të moshuari.

Policia thotë se ngjarja ka ndodhur në rrugën “Siri Kodra”, ku falë ndërhyrjes së shpejtë është arrestuar 27-vjeçari me iniciale E.M.

Ky shtetas sipas policisë, ka qenë i dënuar më parë për vjedhje me dhunë.

Njoftimi:

Parandalohet vjedhja e një banese, arrestohet në flagrancë një shtetas, falë telefonatave nga qytetarët dhe reagimit në kohë të Policisë.

Specialistët për Hetimin e krimit në Komisariatin e Policisë Nr. 4, falë bashkëpunimit me qytetarët, kanë bërë arrestimin në flagrancë të shtetasit E. M., 27 vjeç, banues në Tiranë.

Arrestimi i tij u bë, pasi në rrugën “Siri Kodra’’ u kap duke tentuar të vjedhë në banesën e shtetasit H. A., 63 vjeç.

Ky shtetas, në përpjekje për t’u larguar, ka goditur shtetasin H. A, duke i shkaktuar dëmtime të lehta, por ska mundur të largohet pasi në afërsi të banesës është kapur në flagrancë nga shërbimet e Policisë.

Shtetasi E. M ka qenë i dënuar më parë për veprën penale “Vjedhja me dhunë” në Itali dhe ”Vjedhja, kryer në bashkëpunim, mbetur në tentativë”.

Vijon puna për identifikimin dhe kapjen e bashkëpunëtorëve të tjerë, si dhe dokumentimin e vjedhjeve të tjera të ndodhura në Qarkun e Tiranës, në të cilat mund të jetë i implikuar ky shtetas.

Materialet iu referuan Prokurorisë së Rrethit Gjyqësor Tiranë, për veprën penale “Vjedhja, e mbetur në tentativë” dhe “Plagosje e lehtë me dashje”.