X

Avokati i ditur Ngjela, urdhër SHBA-ve: Ndaloni Ilir Metën! Ka shthurje mendore dhe është ruso-serbo-grek 

Avokati ynë shumë i ditur, njëkohësisht dhe shumë i njohur, Spartak Ngjela, ka lëshuar tre statuse të njëpasnjëshme, me fuqi shfarosëse, për Ilir Metën, ku përshkruhen  edhe hallet e mëdha dhe të pafundme të Shqipërisë tonë të dashur.

– Historia e Shqipërisë në pesë shekuj bashkë, është një tragjedi e stërgjatur e saj, të cilën e kanë krijuar osmanët dhe fqinjët. Ka një agresivitet të madh, – thekson avokati ynë shumë i ditur, – dhe ky agresivitet vjen nga Beogradi dhe Athina dhe pikërisht këtu e gjen shpresën dhe Ilir Meta, por lodhet kot, i mjeri!

– Meta po pret ndihmë nga serbët dhe rusët. Por nuk ka ndihmë serbe apo ruse, që mund të mposhtë sot, aleancën shqiptaro-amerikane, – thotë avokati, si zëdhënësi i FBI-së dhe i Departamentit të Shtetit, sa herë që në rajon mungon Palmeri.

– Shkarkimi i Metës është çështje ditësh, – deklaron me solemnitet avokati ynë i shumëditur.

-Rama i tha Metës para disa ditësh, “unë nuk kam gjë në dorë, këtë çështje e drejton Washingtoni dhe Brukseli”. Në këtë mënyrë, Meta po kërkon ndihmë edhe nga Basha, për të marrë armët, – thekson avokati mendjehollë.

– Washingtoni qesh me Metën, Meta është çakallosur, etj etj etj, përfundime, epitete, apo metafora, jo vetëm shumë të rëndësishme, por edhe nga më origjinalet, nxjerrë nga mendja dhe dora e avokatit tonë të përndritur.

Kini durim dhe lexojini këto statuse më poshtë. I kemi renditur njëri pas tjetrit, kronologjikisht, sipas datës dhe funksionit, që ka kryer në ato çaste, mendja e avokatit tonë shumë të ditur.

/TPZ.al/Tej e këtej/

STATUS 1 :

Kriza Meta, shthurja e tij mendore në frikë, dhe ndihmat që ai kërkon të marrë nga ruso-serbët.

Po kuptohet se, likuidimi i Metës, ndihet si humbje në Beograd dhe në Moskë. Këtë e di edhe Meta.
Meta është në panik, prandaj flet si i ndërkryer. Por ka shpresë te këta. Në fakt, Beogradi e ka destabilizuar shpesh Shqipërinë. Por tani, e ka krejt të pamundur.

Ndërkohë Meta ka filluar lëvizjen për të gjetur brenda vendit aleatë të tjerë që kullosin në Beograd dhe në Moskë.
Kot e ke, Meta! Mos u lodh kot, o Metë! Ata që ti po i kërkon si aleatë, janë të kapur dhe të kërcënuar nga Uashingtoni.
Meta nuk ka shpëtim, duhet të shkojë nëpër procese gjyqësore.

l.
Historia Shqipërisë, në pesë shekuj rresht, është një tragjedi e stërzgjatur e saj, të cilën ia kanë krijuar osmanët dhe fqinjët pushtues. Kjo histori tanimë dihet si fakt historik.
Por, më e rëndë për historinë e Shqipërisë, është shitja që i kanë bërë interesit shqiptar krerët e vet: princa e pashallarë në shekujt e shkruar, dhe, kryeministra e presidentë në këta 100 vjetët e fundit mbas formimit të shtetit shqiptar.
E gjithë kjo llavë e ligë antishqiptare që donte të shfaroste shqiptarët, tani ka rënë në ftohje, dhe historia ka ndryshuar në favor të shqiptarëve. Por, dëshirat e vjetra, dhe frika se po forcohet bota shqiptare në Ballkanin Perëndimor, i ka hedhur edhe pushtuesit aktualë në sulm. Këtë, sigurisht që e di edhe Meta.

ll.
Shqiptarët kanë qenë të vetëm në një botë armiqësore për ta. Tani janë me një aleat të fuqishëm.

Shqiptarët janë në aleancë bilaterale me qëndrën e qytetërimit modern, Shtetet e Bashkuara të Amerikës.
Por, mu këtu fillon zilia e armiqëve shekullorë, pushtues të territoreve shqiptare. Këtu e ka arsyen edhe tensioni që duan të ngrenë në shoqërinë shqiptare, dhe këtu fillon edhe shpresa e tyre për ta filluar sërish agresionin e antishqiptar.
Na ka dalë edhe Rama me “shengenin ballkanik”, që të qorrollepsë Kosovën. Por, kjo është një dëshirë e skaduar tashmë.

lll.
Te ky agresivitet që vjen nga Brogradi dhe Athina, pikërisht këtu e ka shpresën edhe Ilir Meta. Por, lodhet kot, i mjeri ai.

Sot janë dy shtete shqiptarë në Ballkanin Perëndimor. Po del i treti. Dhe nuk do të mbetet me kaq. Pse? Është shumë e thjeshtë si arsye politiko-histotike. Sepse, e vërteta historike e popullit shqiptar në këtë zonë, është guri themelor i politikës amerikane në interesin e saj.
Dhe kjo është shumë e qartë: shqiptarët e Ballkanit Perëndimor janë proametikanët parësorë të kësaj kohe. Por, shqiptarët kanë një histori që ka ecur mes padrejtësisë kundër tyre. A do ta ndreqë këtë padrejtësi Uashingtoni dhe Berlini? Sigurisht.

lV.
Historia e Ballkanit Perëndimor, që nga luftrat kastriotiane dhe mbretëria kastriotiano-arbërore, e deri më sot, është krejt e krejt një histori shqiptare. Kudo, edhe sot, shqiptarë të dhunuar ka në Ballkanin Perëndimor, por, tani, ka edhe dy shtete shqiptarë. Këtu në fakt, dhe pikërisht në këtë pikë historike, ka filluar politika amerikanë në kultivimin real të aleancës amerikano-shqiptare.

Historia është histori, dhe fuqia arbërore e ringritur në Ballkanin Perëndimor, është interes amerikan dhe, sigurisht që është edhe interes shqiptar. Në fakt, kjo është politika aktuale.

Por, për të filluar këtë politikë, duhej ndrequr një padrejtësi. Dhe padrejtësia qëndrore u ndreq sipas drejtimit amerikan: pavarësia e Kosovës. Por, ka edhe një padrejtësi të brendshme: është korrupsioni shtetëror në Shqipëri. Prandaj, politika amerikane e nisi paralel edhe luftën për drejtësinë në Shqipëri.

Pas kësaj ndërmarrjeje, të gjithë kundërshtarët e shqiptarëve, domethënë pushtuesit e territoreve shqiptare, u hodhën në sulm. Dhe, e dini se ku ka konsistuar ky sulm? Në blerjen dhe përdorimin e liderëve shqiptarë. Ky tani është fakt. Por, a e di politika amerikanë këtë? Sigurisht që e di me fakte. Madje faktet ua ka nxjerrë dhe disave prej tyre, të cilët kanë heshtur sot.

V.
Po Meta, ku po kërkon ndihmë? Edhe Meta andej po duket se e pret ndihmën. Por, nuk ka ndihmë serbe apo ruse që mund ta mposhtë sot aleancën shqiptaro-amerikane.

Gjithçka do të shkojë deri në fund. Meta do të pushohet nga Parlamenti në këto ditë, dhe nuk do të ketë më forcë juridike, domethënë nuk do të ketë të drejtë të nxjerrë qoftë dhe një akt administrativ, derisa të gjykohet nga Gjykata Kushtetuese. Sepse është bërë i rrezikshëm për ecurinë normale të Shqipërisë.
Ndërkohë do të fillojë t’i dokumentohen të gjitha pronat apo paratë e depozituara.

Kurse, Meta ndërkaq, po kërkon të flasë me ambasadorët perëndimorë në Tiranë! Do t’i takojë këto ditë.
Kot e ka. Mendon se mund t’i kërcënojë ata me destabilizimin e Shqipërisë.
Por, si do t’i kërcënojë?
Mendon të takojë Bashën e gjithë të tjerët e opozitës jashtëparlamentare, që, me ta, të sigurojë lëvizje antishtet me përkrahësit e Partisë Demokratike dhe të tjerët. Me këtë kartë, me anë të ambasadorëve, Meta mendon të trembë kancelaritë perëndimore. Hajde naivitet, hajde! Vërtet mendon Meta se do të ketë ndihmë për të përdorur turmat në Tiranë!

Kjo tani është një ndërmarrje pa gjasë. Askush nuk ka dëshirë të sakrifikojë veten për Metën.
Në fakt, ata që po kërkon Meta, janë të gjithë të kapur. Nuk besoj se do të duan të rëndojnë veten, dhe prandaj nuk do t’i përgjigjen Metës.
Asgjë. Askush nuk do t’i përgjigjet. Ose do ta shtyjnë me shpresë, me sot apo me nesër.

Meta është i humbur. Kërkon që me një protestë masive të shpëtojë veten nga penalizimi. Kohë e humbur kot. Kjo është pamundësi absolute. Mundësia e vetme që do t’i jepte shpresë Metës, është përballja juridike në gjykatat ku do të shkojë…
Asgjë tjetër.


STATUS 2:

Askush nuk po ia hap derën në Amerikë gruas së Ilir Metës.
Kurse Meta, ende reziston për të dëmtuar Shqipërinë.
Është i pushuar. Këtë nuk do që ta kuptojë, dhe mendon se mund të blejë politikën e lartë me paratë e tij të pista. Turp. Pamundësi absolute; por kujt t’i thuash!
Mbasi të pushohet nga Parlamenti, Meta nuk ka më forcë juridike.
Ku kuptohet se shkarkimin i Metës është çështje ditësh?

Rama i tha Metës para disa ditësh: unë nuk kam gjë në dorë, këtë çështje e drejton Uashingtoni dhe Brukseli.
Atëherë?
Meta do shkaktohet, se ka bërë shkelje shumë të rënda.
Vërtet mendon Meta se, për të mbrojtur veten dhe pronat e tij të paligjshme, mund të shpëtojë duke bërë kryengritje kundër partnershipit të Tiranës me Uashingtonin? Mëndjelehtësi infantile.

Procesi për të shkarkuar Metën ka mbetur në vend, sepse, siç duket, e ka bllokuar Rama. Po tani, nuk ka më gjasë të ndalojë. Këto ditë procedura duhet ta shkarkojë.

Të gjithë të trembur janë, por reforma do të shkojë deri në fund.

Shqiptarët janë të mërzitur, sepse janë tradhëtuar nga krerët e tyre, të cilët i kanë grabitur ligsht në 25 vjet rresht. Viti 1991, që mendohej se do t’u sillte shpëtimin, i zhyti ligsht shqiptarët në një skllavëri të re.
Kjo është e vërteta e kësaj kohe.

Por, shkarkimi i Metës nga Parlamenti, është hapi i parë i madh i likuidimit ligjor të të gjithë kësaj klase dirigjente që, me një korrupsion gjigand, ka shkatërruar mirëqënien e shqiptarëve për të siguruar miliarda dollarë si pará individuale pushtetarësh; mijëra hektarë tokë e truall, dhe qindra mijëra metër katrorë ndërtim mbi pronën e grabitur me falsifikime korruptive.
Shqiptarët duhet të jenë të sigurt, se kundër korrupsionit shqiptar atyre iu është zotuar politika amerikanë. Të gjithë të korruptuarit e lartë do të shpronësohen.
Ilir Meta është i pari.


STATUS 3:

Komedia Meta vijon…
Meta sot kërkoi ndihmë nga Basha për të marrë armët.
Basha sigurisht që tallet me të, sepse situata e tyre është shumë e rëndë. Kurse Basha ka hallin e tij.
Basha mezi po i rregullon yneret e tij në Amerikë, kurse Meta kërkon luftë me Amerikën dhe Bashkimin Europian!!! Basha e di mirë çdo të thotë kjo luftë, se e provoi me mbledhjen e molotovëve në protestën e fundit. Po Meta, a e di këtë?

Meta, në fakt, është në situatën kur nuk kupton dot asgjë. Kërcënon diplomatët, shpif, dhe me mendjelehtësi mendon se kanceleritë e mëdha perëndimore mund të “tremben”. Dhe ka filluar të flasë për sovranitetin. Si Enver Hoxha, kur i rrezikohej karrigia. Por nuk ka asnjë shqiptar që ta përkrahe, me përjashtim të atyre që ka pranë dhe i paguan.
Në fakt, është i trembur, dhe nën klithma frike po kërkon sovranitet për të garantuar pronat dhe paratë e tija.
Këtë sigurisht që e kuptojnë të gjithë shqiptarët, prandaj po e neverisin. Kurse Uashingtoni sigurisht që qesh me të, se e di madje edhe ku i ka depozitat e parave.
Por, tani që Ilir Meta po bën si i çakallosur, a do ta denoncojë Uashingtoni që edhe shqiptarët t’i dinë bëmat e tij korruptive?

 

 

* Për më shume bashkohuni në grupin tonë: https://www.facebook.com/groups/tpz.al/
More in TEJ E KETEJ
Ekipi francez kërkon takim urgjent me Fevziun: Duam librin “Tirana e Nonës”!

Sot në mesditë, ekipi kampion i botës, Franca, zbriti në kryeqytetin e Shqipërisë, Tiranë. Sapo u akomodua në hotel, trajneri...

Close