X

Plagjiatura/ Reagon Ogerta Manastirliu: Shpifje, kam punuar me profesionalizëm!

Ditën e sotme, “Lëvizja për Universitetin”, publikoi disa pasazhe nga doktoratura e ministres së Shëndetësisë, Ogerta Manastirliu, të cilat ishin kopjuar nga një disertacioni masteri të një diplomanti në Afrikën e Jugut. Manastirliu, ka reaguar pas këtyre akuzave, duke thënë se janë “shpifje” dhe se ka punuar me profesionalizëm.

Manastirliu tha se ajo e ka cituar burimin në fund të punimit. Por, po të shihen të dyja punimet, ajo e diplomantit nga Afrika e Jugut dhe doktoratura e ministres, vihet re një ngjashmëri shumë e madhe. Në të dyja punimet, janë cituar të njëjtët akademikë dhe me tekst identik, çka shton dyshimet se nuk kemi të bëjmë me një rastësi apo qoftë edhe me plagjiaturë aksidentale, por të qëllimshme. Gjithashtu, punimi i Fannie Mnisi, është një disertacion, pra ky person ka qenë nje aspirant për master dhe është i çuditshëm fakti që ministrja t’i referohej si burim punimit të disertacionit të një masteri, kur ajo ka qenë në nivelin e doktoraturës, gjë që çdokush që ka shkruar ndonjëherë një punim akademik, e kupton fare thjesht. Ngjashmëria identike e disa pasazheve të disertacionit të masterit eë Fannie Mnisi në vitin 2008, me doktoraturën e ministres të shkruar në 2013, flet qartë, sido që të jetë interpretimi i ministres.

Reagimi i plotë i ministres: 

Akuza e sotme rreth Doktoraturës time, nuk është një nga ato akuza të përditshme, për të cilat mjafton një reagim mohues. Eshtë një akuzë që cënon direkt dinjitetin tim, atë të profesorëve të mi dhe të Fakultetit të Shkencave të Natyrës.
Doktoratura ime është realizuar, bazuar në Rregulloret e FSHN, të miratuara nga Ministria e Arsimit dhe Shkencës.
Edhe pse për të kuptuar falsitetin e akuzës, do të mjaftonte fakti që akuzuesit i referohen vetëm 4-5 citimeve nga një material shkencor prej 96 faqesh – të shkëputura këto nga pjesa teorike e materialit, dhe jo ajo eksperimentale shkencore – prapëseprapë kam kërkuar vlerësimin dhe analizën e profesorëve të Fakultetit të Shkencave të Natyrës. Sepse për vetë natyrën e punës që bëjnë përditë, besoj se janë ata që kuptojnë, vlerësojnë dhe munden të konkludojnë në lidhje me këtë studim.
Në fakt, punimi im, ashtu si çdo doktoraturë tjetër, në pjesën teorike ka jo vetëm këto, por edhe të tjera referenca (të përmendura në 4 faqe citime në fund të punimit), të cilat lidhen me temën e mbetjeve urbane në landfill-e. Diferencën në këto studime e bën ndryshimi në analizat kimike të objektit konkret të studimit dhe analizimi i këtyre rezultateve, të cilat vërtetojnë origjinalitetin e punimit.
Për sa më takon, e them me përgjegjësi të plotë, se kam punuar me profesionalizëm në kryerjen e saj, falë edhe përkushtimit të udhëheqëses shkencore dhe profesorëve të tjerë të nderuar. Duke zbatuar me përpikmëri çdo rregullore të sistemit universitar shqiptar, gjatë punës në terren për fazën eksperimentale.
Mbetem e bindjes se i duhet dhënë fund një herë e mirë lehtësisë me të cilën ngrihen tymnaja shpifjesh në këtë vend. Ashtu sikurse besoj fort se janë ekspertët dhe komisionet e çertifikuara nga institucionet, që duhet të shprehen, duke mos lejuar që shpifjet t’i zërë vendin të vërtetave.
Hedh poshtë me neveri çdo insinuatë dhe përdorim dashakeq që i bëhet emrit tim dhe mbetem si gjithmonë, me besimin se puna flet më shumë se sa fjalët dhe shpifjet.

***
Më poshtë, deklarata e Prof. Dr. Pranvera Lazo, udhëheqëse e Doktoratës, Pedagoge në Fakultetin e Shkencave të Natyrës, Departamenti i Kimisë:
“Punimi i Doktoraturës me temë: “Krahasimi i monitorimeve të mjedisit në landfill-in e Sharrës, para dhe pas ndërhyrjes si dhe ndikimet në mjedis”, është kryer në Fakultetin e Shkencave të Natyrës, dhe i përket një punë eksperimentale të kryer në një periudhë 5-vjeçare (2008-2012) në landfillin e Sharrës, ku janë marrë në studim të gjithë komponentet mjedisore që shkaktojne impakt në mjedis dhe shëndet.
Për këtë qëllim janë marrë në studim sistemi ujor sipërfaqësor, ndikimi i landfillit në ujin e puseve dhe ujin e pijshëm që konsumojnë banorët e zonës, si dhe impakti i emetimeve ajrore të landfillit.
Studimi është realizuar i ndarë në 6 ekspedita të veçanta për studimin e impaktit të landfillit në sistemin ujor, ku janë marrë në konsideratë 21 parametra kimiko-fizike, dhe në 2 ekspedita për studimin e impaktit në ajër, ku janë vrojtuar dhe përcaktuar 5 parametra kimike, që ndikojnë direkt në shëndet. Studimi është i ndarë në 2 pjesë, pjesa Teorike me 24 faqe, dhe pjesa Eksperimentale me rreth 65 faqe.
Pretendimet e nje specialisti jo të fushës, me 4-5 citime të shkëputura në pjesën teorike, nuk e zbehin vlerën e këtij studimi të mirëfilltë, ku rezultatet eksperimentale i përkasin tërësisht objektit të vendgrumbullimit të mbejtjeve në Sharrë. Punimi është ORIGJINAL dhe ka rezultate me vlerë mbi gjendjen mjedisore të landfillit dhe masat që duhen marrë ne të ardhmen”.

/TPZ.AL/ 

LEXO EDHE: 

Zbulohet plagjiatura e Ministres së Shëndetësisë Ogerta Manastirliu, kërkohet dorëheqja e saj e menjëhershme

* Për më shume bashkohuni në grupin tonë: https://www.facebook.com/groups/tpz.al/
More in AKTUALITET, LAJME
Caktohet data, Kuvendi hedh më 7 dhjetor shortin për KED

Ashtu siç pritej do të jetë Kuvendi që do të hedhë shortin për Këshillin e Emërimeve në Drejtësi. 7 dhjetori...

Close