Thellohet skandali, Braçe thërret për raportim Koçin e AMF-së pa njoftuar opozitën

Tpz.al denoncoi një ditë më parë veprimin arbitrar të kryetarit të Komisionit të Ekonomisë, Erion Braçe, i cili nuk kishte thirrur për raportim, Kryetarin e Autoritetit të Mbikqyrjes Financiare, Ervin Koçi.

Por sot ka reaguar menjëherë Erion Braçe, i cili edhe pse në shkelje me afatet kohore, ka thirrur me nxitim Koçin e AMF-së për të folur mbi ecurinë e institucionit që ai drejton. Edhe pse në pamje të parë duket sikur Braçe ka larë duart me këtë veprim, në fakt ai ka kryer një tjetër shkelje të madhe.

Asnjë nga anëtarët e opozitës në Komisionin e Ekonomisë nuk është njoftuar për këtë mbledhje të sotme, ku do të raportonte Ervin Koçi. Sekretarja e këtij komisioni, nuk i ka dërguar as email dhe as sms, deputetëve të opozitës për këtë seancë dëgjimore, njësoj siç njofton çdo javë.

Përveç kësaj, Ervin Koçi do tu përgjigjet pyetjeve të deputetëve në datë 15 maj, në një tjetër seancë dëgjimore në Komisionin e Ekonomisë. Por deputetët e opozitës nuk janë njoftuar as për depozitimin e pyetjeve, madje Erion Braçe ka vendosur si afat të fundit, orën 16:00, të ditës së sotme. Në këtë mënyrë flagrante, u heq të drejtën deputetëve të opozitës që të bëjnë pyetjet në drejtim të Ervin Koçit.

E gjithë kjo përpjekje për të fshehur këtë seancë dëgjimore, ka një shpjegim, atë të mospërballjes me një seri shkeljesh që kanë përfshirë institucionin e AMF-së dhe drejtuesin e saj. Dhe për ta mbuluar z. Koçi, ka shërbyer ish kolegu por njëherësh miku i tij, Erion Braçe.

Tpz.al ka denoncuar me fakte, disa skandale të Kryetari të Autoritetit të Mbikqyrjes Financiare, Ervin Koçi. Që nga tenderat për blerjen e një makine prej 95 milionë lekësh, arredimi i zyrës me një vlerë prej 61 milion lekësh e deri tek konkursi fiktiv për punësimin e bashkëshortes.

Për asnjë nga këto çështje të përfolura mediatikisht, Ervin Koçi nuk ka dhënë shpjegim. Gjatë fjalës së tij, sot në Komisionin e Ekonomisë, Krytari i AMF-së ngriti shqetësimin e mosshlyerjes së dëmeve nga kompanitë e sigurimeve. Për të sfumuar shkeljet e tij, Koçi u kujdes që të rreshtohej në krah të qytetarëve, gjatë raportimit përballë Erion Braçes.

Ky raportim i fshehur i Koçit, kishte shkelur çdo afat kohor. Në fillim të muajit janar, gjatë mbledhjes së Konferencës së Kryetarëve, Gramoz Ruçi vendosi që brenda muajit mars 2018, plot 27 institucione të raportonin në Komisione, për veprimtarinë e tyre gjatë vitit 2017. Institucioni që nuk ishte thirrur për raportim prej dy vjetësh deri më sot nga Komisioni i Ekonomisë, ishte AMF.

Pyetja që ngrihet është se kujt i shërben ky shoë i fshehur i Komisionit të Ekonomisë? Siç njoftoi më herët, Tpz.al do të publikojë në vijim të tjera denoncime, duke nisur që nga emërimi i tij në krye të AMF-së, punësimet në administratën e tij, abuzimi me parketin e shtruar tek zyra e tij e deri arsyeja se përse është i lidhur kaq fortë me Erion Braçen./TPZ.AL/E.H./

Më poshtë foto gjatë Komisionit të Ekonomisë: