X

Zbulohet në SHBA një skemë mashtruese për pranimet në universitete

Prindër të famshëm të Hollivudit, trajnerë dhe administratori i një universiteti janë në mesin e 50 personave të akuzuar në një skemë mashtruese për pranimet në disa prej kolegjeve më të famshëm të SHBA.

Prokurorët e quajtën skemën “mashtrimi më i madh i këtij lloji i ndjekur ndonjëherë penalisht nga Departamenti i Drejtësisë.”

Studentët u pranuan në shkolla elitë tepër konkurruese, pasi prindërit e tyre kishin paguar një person me emrin William Rick Singer për të organizuar provime të rreme, kredenciale të rreme dhe arritje të rreme në sporte, njoftoi Departamenti i Drejtësisë të martën në një konferencë shtypi.

Prindërit e akuzuar, përfshijnë aktorët Felicity Huffman dhe Lori Laughlin. Ata akuzohen se u kanë paguar me qindra mijëra dollarë për të siguruar që fëmijët e tyre të pranoheshin në kolegje prestigjioze amerikane – si universitetet Yale, Stanford, Georgetown – pa pasur kredencialet ose aftësitë e kërkuara.

“Këtu nuk po flasim për dhurimin e një ndërtese,” shpjegoi prokurori Andrew Lelling. “Po flasim për marrje ryshfetesh nga zyrtarët e kolegjit”.

Një akuzë përfshin kreun e futbollit për femra në Universitetin Yale, që zyrtarët e drejtësisë thonë se ka pranuar 400,000 dollarë, për të siguruar pranimin e një studenteje. Më vonë, sipas akuzës, ai ka marrë një shtesë prej 1.2 milionësh nga prindërit e vajzës për këtë qëllim. Në disa raste, tha prokurori, Singer bashkëpunoi me prindërit “për të krijuar profile atletike mbresëlënëse për fëmijët e tyre”, duke përfshirë pjesëmarrje të rreme në ekipet elitë.

More in BOTA, LAJME
Përplas kalimtarin në Kamëz, shoferi e dërgon me makinën e tij në spital

Një kalimtar është përplasur nga një makinë e tipit “Mercedes Benz” teksa kalonte rrugën shumë pranë qendrës së qytetit të...

Close