Fino ankohet në CAS. Konteston votimin në zgjedhjet për kreun e FSHF-së

Beteja e zgjedhjeve për kreun e FSHF edhe pse e mbyllur per komunitetin sportiv vendas, UEFA-n dhe FIFA-n, nuk ka mbaruar ende për kandidatin Bashkim Fino, i cili i humbi këto zgjedhje pas balotazhit përballë Presidentit Armand Duka.

Edhe pse gjatë procesit të Asamblesë Zgjedhore çështja e pjesëmarrjes së 12 shoqatave kaloi e sqaruar nga avokati Artan Hajdari, rezultati në mbyllje të punimeve të asamblesë zgjedhore ka rikthyer këtë diskutim, duke e detyruar kandidatin Fino të çojë këtë çështje në CAS-in shqiptar dhe të atë të Lozanës.
I kontaktuar nga Top Channel, Bashkim Fino sqaron hapat e ndërmarrë.

“E kam dërguar me kohë në KAS çështjen e zgjedhjeve. Ne në fillim kemi bërë një ankimim në KAS-in vendas, sepse ashtu është si procedurë edhe pse me sa di unë Federata nuk e njeh KAS-in shqiptar, për këtë arsye e kemi dërguar edhe në KAS-in e Lozanës. Por me sa më ka informuar, KAS-i i Lozanës i ka sjellë Federatës Shqiptare të Futbollit dhe studios tonë të avokatisë, një shkresë ku i kërkon ta zgjidhin këtë çështje në KAS-in vendas, në rast të kundërt brenda 3 ditësh do të fillojë çështja në Lozanë”, thotë Fino.

Ndërkohë, Federata Shqiptare e Futbollit nuk ka ndërmarrë asnjë hap duke mos e konsideruar si çështje këtë kërkesë të kandidatit Fino, duke theksuar faktin se KAS-i vendas është një institucion i cili nuk është i regjistruar në gjykatë dhe si të tillë nuk e njeh, ndërkohë që sa i përket KAS-it të Lozanës, sipas FSHF, ende nuk ka një çështje të hapur zyrtarisht, duke i lënë gjithçka për momentin organizmave të drejtësisë sportive vendase.

Top Channel

 

More in AKTUALITET, LAJME, SPORT
Teatri i ri me katër kulla, arkitektët: Humbasim një vlerë historike!

I projektuar nga një prej arkitektëve më të njohur në botë, danezi Bjarke Ingels, teatri i ri kombëtar do të...

Close